Tuir informasaun, kazu sona iha UNPAZ ne’e rezulta estudante semester ida ho naran Alfredo Miranda Alves, husi Departamentu Saúde Publiku, Fakuldade Saúde Públiku, hetan kanek todan iha parte kotuk laran.
Deskonfiansa inisiu, ema deskoñesidu ida uza motor tama ba area UNPAZ hodi sona Alfredo.
Hafoin akontesimentu ne’e, Reitór UNPAZ Adolmando Amaral hatete, maske akontesimentu ne’e akontese iha area universidade nian, maibé universidade nunka hanorin nia estudante sira lori kroat ba eskola.
"Akontesimentu ne'e akontese iha universidade duni, maibé universidade la hanorin par lori tudik mai kampus," dehan Adolmando Amaral ba jornalista sira iha nia knaar fatin Manleuana, Segunda (03/08).
Nia hatete, daudauk ne’e, Polísia Nasionál Sientífika Investigasaun Kriminál (PNSIK) foti ona dadus ba kazu refere.
"Kazu ohin ne'e mós husi PNSIK foti ona dadus husi sasin sira, entaun ita hein de'it nia rezultadu, tanba akontesimentu ne'e estudante ho estudante ka ema li’ur mak mai hakenek estudante ne'e ita la hatene," nia dehan.
Kona-ba vitima ne’ebé hetan sona, Adolmando dehan, bainhira nia to’o mai universidade, vitima dezloka ona ba Ospital Nasionál Guido Valadares.
"Ha'u to'o mai, akontesimentu ne'e akontese tiha ona, entaun informasaun ne'ebé ha'u hetan katak pro-reitór asuntu akadémiku ho dosente no estduante balun dezloka ona vitima ba iha ospitál hodi halo tratamentu."
Relasiona ho kazu ne’e, Adolmando dehan, parte universidade mós bolu ona parte PNTL ne'ebé durante ne’e destakadu iha area UNPAZ hafoin mosu kazu joven ida monu tuun husi andar leten iha fulan kotuk.
"Ami iha ne'e seguransa la'o, ami mós hetan apoiu husi PNTL ne'ebé mak sempre mai garante estabilidade iha ne'e. Maibé ohin akontese ne'e mak ami bolu ona parte seguransa sira, par husu sira-nia responsabilidade, tanba saida mak sira labele kaptura suspeitu," dehan nia.
Relasiona ho seguransa iha UNPAZ, jornalista www.tempotimor.com konfirma ho komandante Polísia Nasionál Timor Leste (PNTL) Munisípiu Dili Superentedente Xefe Henrique da Costa, maibé komandante dehan, relatóriu husi eskuadra Dom Aleixo seidauk tama komandu nia liman.
Entretantu, tuir informansaun ne'ebé mak www.tempotimor.com asesu, dadaun ne'e vitima hala’o hela tratamentu iha ONGV.