FALINTIL sei 'Halo Gerilla' Dala Ida Tan

Xefe Estado Maios F-FDTL, Kolonel, Koliati (segundu husi liman Karuk) hamutuk ho ninia estrutura wainhira ko'alia ba Jornalista sira iha Kuartel Jeral F-FDTL Fatu Hada Dili (30/7) Xefe Estado Maios F-FDTL, Kolonel, Koliati (segundu husi liman Karuk) hamutuk ho ninia estrutura wainhira ko'alia ba Jornalista sira iha Kuartel Jeral F-FDTL Fatu Hada Dili (30/7) Foto Tempo Timor

TempoTimor (Dili) - Forsa Armada Libertasaun  Independénsia Timor-Leste (FALINTIL) sei 'gerilla' hodi haleu Timor-Leste dala ida tan.


Atividade ne'e halo hodi komemora loron FALINTIL ba dala 45 ne'ebé sei monu iha loron 20 Agostu.

Prezidente Komisaun Organizadora, Koronél Calisto dos Santos 'Coliati' hateten, komemorasaun loron istóriku FALINTIL nian halo parte rua, haleu Timor-Leste no parada militar.

"Primeiru, ami sei halo tour FALINTIL ne'ebé sei perkorre hadulas munísipiu 12. Segundu, halo serimónia parada ba loron 20 Agostu 2020," dehan nia, ba jornalista sira, iha Kuartél Jerál F-FDTL, Fatuhada, Kuarta (29/07).

Nia informa, atividade Tour FALINTIL ne'e sei hahú iha loron 8 Agostu 2020. Loron dahuluk sai husi Dili para iha Postu Administrativu Bobonaru, no iha ne'ebá sei hala'o atividade solidariedade no kulturál, ne'ebé halo hamutuk ho Konsellu Veteranu no Ministériu Veteranu nian, iha Bobonaru.

Hafoin atividade iha Bobonaru, sira sei liuhusi Altu Lebos, tun ba Maukatar depois tama ba Suai-Vila, kontinua ba Suai Loro depois kontinua Zumalai, Kassa, Hatu'udu, no liuba Same-Betanu konsentra hamutuk ho Konsellu Veteranu no Ministériu Veteranu hodi komemora loron FALINTIL iha rejiaun III.

Atividade hanesan iha rejiaun IV Maliana nian, sei halo mós iha Betanu.

Hafoin ne'e, iha loron 10 Agostu sai husi Betano ba Krarás. Iha ne'ebá, sira sei komemora loron FALINTIL ba rejiaun II ho atividade ne'ebé hanesan.

Iha loron 11 Agostu, sei kontinua nafatin ba parte leste, sei liuhusi postu Uatulari, depois kontinua nafatin tour ba Iliomar no iha fatin ne'e sei selebra mós loron FALINTIL nian iha rejiaun I.

Iha loron 12 Agostu sei kontinua mai Lospalos, no sei ba halo parajen iha Aldeia Poros, Postu Administrativu Tutuala.

Iha loron 13 Agostu, sai husi Poros fila mai Dili, depois halo enseramentu.

Tama ba segunda faze, iha loron 20 Agostu sei hala'o parada militár iha Kuartél Jerál Fatuhada. 

Ba atividade tour FALINTIL nian sei loke mós oportunidade ba publiku tomak ne'ebé hakarak partisipa iha eventu ne'e.

"Nakloke ba públiku tanba ne'e la'ós de'it ba FALINTIL sira, maibé ba ema hotu-hotu. Loron FALINTIL ita komemora loron ba Asswa'in sira ne'ebé hala'o rezisténsia hasoru okupasaun hodi lori ita-nia rain ba independénsia, dehan Coliati.

Maski nune'e, ba sira ne'ebé hakarak partisipa ida-idak tenke prepara rasik sira-nia lojistika. (*)  

Rate this item
(1 Vote)
Last modified on Friday, 31 July 2020 14:35
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.