PNTL Husu Manifestante Kontra Ministru Cárceres Kumpre Lei

Portavós Komjer PNTL, Superintendente Arnaldo Araújo ko'alia ba Jornalista sira iha nia kna'ar fatin iha Dili Portavós Komjer PNTL, Superintendente Arnaldo Araújo ko'alia ba Jornalista sira iha nia kna'ar fatin iha Dili Foto File

TempoTimor (Dili) - Komandu Jerál Polísia Nasionál Timor-Leste aviza ba manifestante ne'ebé atu halo asaun pasífiku kontra Ministru Justisa, Manuel Cárceres atu kumpre lei bainhira halo sira-nia asaun.


Portavós Komjer PNTL, Superintendente Arnaldo Araújo hateten, estudante Front Universitariu Timor-Leste (FUTL) sira tenke kumpre lei númeru 05/2017 ne'ebé regula kona-ba arman branka, atu evita lori sasán tama iha área manifestasaun nian, no mós distánsia metru 100 husi instituisaun Estadu.

"Distánsia husi manifestante sira ba iha edifísiu Estadu ne'e tenkesér metru 100. See ida ne'e maka sira la kumpre, polisia sei foti asaun ba ida ne'e", hateten nia.

Nia dehan, komandu PNTL Munisípiu Dili nia área jurídiku no nia sei fó seguransa tomak ba iha asaun ne'e. Karik iha ema ruma hakarak tama laran hodi estraga asaun ne'e, polisia prontu atua.

"Sim, ne'e klaru, polisia sei la tolera aktu krime ruma mai husi terseira pesoa. Ne'e PNTL sei foti asaun ida makaas", dehan nia.

Nia husu ba manifestante sira tenke responsável ba sira-nia asaun rasik, atu sira bele identifika didi'ak ema sira ne'ebé maka tenta tama iha laran sem autorizasaun.

"Tenke identifika see karik ema buat ruma ka ema individu ruma tama iha ne'ebá maka halo asaun ruma, sira tenke informa ba polisia para bele foti asaun ruma hodi halo prosesu ba ema ida ne'e", dehan nia.

Kona-ba kuantidade membru PNTL hira maka atu koloka hodi asegura asaun ne'e, nia dehan, polisia nia kompeténsia no segredu polisia nian. (*)  

Rate this item
(0 votes)
Last modified on Friday, 31 July 2020 14:35
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.