Komandante PNTL Dili, Superentedente Xefe Henrique da Costa hatete, PNTL identifika universidade sira hodi serbisu hamutuk, tanba universidade iha poténsia boot hodi harii paz, dame no estabilidade iha Sidade Dili.
"Liu husi vizita ne'e bele serbisu hamutuk, liu-liu bele amijade liu tán par oinsa bele realiza ita-nia mehi ne'ebé ita hotu hakarak hanesan paz no estabilidade par ita-nia sosiedade iha Dili bele moris hakmatek," dehan Henrique ba jornalista sira hafoin vizita UNPAZ iha Manleuana, Kuarta (22/07).
Nia hatete, PNTL Dili hakarak serbisu hamutuk ho universidade sira, tanba sira iha poteensia boot hodi kontribui sosiedade nia moris hakmatek.
"Ami identifika universidade sira, tanba sira iha poténsia boot hodi atinze ami nia mehi, liu-liu iha paz, tanba kada universidade iha estudante barak ne'ebé bele kontribui ba harii dame," nia dehan.
Iha fatin hanesan, Reitor UNPAZ Adolmando Amaral hatete, vizita Komando PNTL Dili ba UNPAZ koalia kona-ba oinsa atu UNPAZ bele kontribui ba paz.
"Vizita komandu munisípiu Dili nian mai iha ne'e hanesan fahe informasaun ho universidade, liu-liu UNPAZ, par oinsa superiór sira husi UNPAZ bele kontribui, inklui oinsa hatutan ba sosiedade par bele organiza an hodi bele kontribui ba paz no estabilidade," nia dehan.
