Formasaun ne'e rasik sei hala'o husi Adidu Militár forsa EUA, Majór Pablo Valerin ba membru na'in 10 ho durasaun loron tolu, hahú husi 21 to'o 23 Jullu 2020.

Majór Pablo Valerin dehan, SEACAT nu'udar treinamentu ida ne'ebé envolve forsa husi nasaun hamutuk hamutuk 50 inklui TL hodi haree besik liu ba kestaun seguransa iha tasi ba nasaun hotu-hotu nian.

Formasaun ba membru forsa Navál ne'e importante tebes, tanba TL sai ona hanesan membru observadór SEACAT, presiza atu hatene kona-ba informasaun globál kona-ba seguransa tasi nian hodi bele prepara aan ba futuru proteje rikusoin tasi.

"Ezersísiu SEACAT ne'e importante tebes envolve nasaun 50 inklui Timor-Leste iha rejiaun ASEAN, ne'ebé tau sira-nia ideia hodi partilla kona-ba seguransa marítima nian, tanba Timor-Leste nia ekonómia depende ba mina no gás presiza proteje ita-boot sira-nia tasi hodi hametin ita-boot sira-nia relasaun iha rejiaun ASEAN", dehan Valerin, bainhira halo abertura formasaun SEACAT, iha Komponente forsa Navál Lizeira, Hera (21/07).

Nia dehan, EUA sente kontente tebes, tanba bele servisu hamutuk ho Timor-Leste no membru nasaun 50 ne'ebé servisu iha SEACAT.

Formasaun ne'e rasik hetan apoiu husi forsa Mariña Portugál, Austrália ne'ebé halao misaun hosi apoia dezenvolvimentu F-FDTL nian.

Iha fatin hanesan, Komandante Komponente Forsa Nável FFDTL, Kapitaun Fragata, Joăo da Silva, agradese ba forsa EUA tanba bele fasilita formasaun ba ne'ebé importante tebes hosi eleva membru sira-nia kapasidade hodi dezenvolve instituisaun F-FDTL, liu-liu komponente Navál.

Ezersísiu SEACAT ne'e importante tanba Timor-Leste mós bele fó kontribuisaun ba estabilidade seguransa tasi nian, liuliu iha área rejionál. 

Kapitaun Fragata Joăo hatutan, maski TL oras ne'e daudaun sei sai hanesan observadór SEACAT, maibé TL bele aprende ona matéria importante sira liuliu hodi partilla informasaun ba nasaun membru SEACAT hodi hametin nafatin kooperasaun servisu iha área tasi nian.

"Timor-Leste hanesan observadór, maibé sira (SEACAT) mós fó oportunidade hodi partilla informasaun kona-ba seguransa tasi nian atu bele servisu hamutuk akompaña di'ak liután formasaun ida nee", hateten nian.

Nia hatutan, daudaun ne'e, membru forsa Navál barak maka ba tuir formasaun iha rai-li'ur hodi prepara aan servisu ho membru forsa nasaun viziñu sira atu projete TL nia rikusoin iha tasi. (*)