Print this page

Kazu Hana Ema, FM: OPS no Intelijensia Tenke Servisu Maka’as

Tempotimor (Dili)-Relasiona ho kazu rama ambon ne’ebé akontese iha loron hira ba kotuk, hodi autór rama ambon hana tan sidadaun ida iha área Ai-mutin, mak Fundasaun Mahein nu’udar sosiedade sivíl ida ne’ebé haree ba parte seguransa nian, husu ba Ofesiál Polisia Suku (OPS) no Servisu Informasaun (SI) atu servisu maka’as para minimiza krime sira ne’ebé akontese iha sosiedade nia leet.
Tuir diretór ezekutivu FM João Almeida husu ba parte Polísia Nasionál Timor Leste (PNTL) liu-liu hanesan Ofesiál Polísia Suku (OPS) no Servisu Informasaun ka Intelijensia sira para halo identifikasaun ba área ne’ebé iha poténisa ba krime. 
 
“Kazu rama ambon ne’e, foin lalais rejista kazu ida, ne’ebé suspeitu ne’e ema deskoñesidu, agora kazu sira hanesan ne’ FM alerta beibeik ona, para PNTL toma médida, liu-liu prevensaun krime ninian, tanba papél importante ida husi PNTL liu-liu OPS no servisu informasaun sira, liu-liu halo identifikasaun ba área sira ne’ebé iha krime, para bele identifika grupu organizadu sira ne’ebé iha poténsia atu halo krime iha komunidade nia leet,” dehan diretór ezekutivu FM João Almeida ba www.tempotimor.com iha nia knar fatin fomentu II, Sesta (17/07)
 
Diretór ne’e mós dehan, komandu presiza ativa fila fali parte identifikasaun ba área sira ne’ebé sempre mosu krime.
 
“Ligadu ho rama ambon, komandu presiza haree ativa fila fali servisu identifikasaun ba área sira ne’ebé risku ba violensia hanesan mós rama ambon,” dehan João
 
Nia afirma, OPS servisu di’ak tebes, maibé tenke hala’o knar ne’ebé atribui husi komandu liu-liu oinsa halo identifikasuan ba área sira ne’ebé risku. 
 
“OPS servisu di’ak teb-tebes, tanba FM halo avalisaun iha 2018, servisu OPS nian, FM haree katak, OPS sira-nia vizibilidade ka área kobertura, kuaze pursentu 80% komunidade sira satisfeitu ba OPS nia servisu, maibé knaar neebé atribui ba OPS hodi ajuda komandu mak tenke talo identifikasaun ba grupu sira ne’ebé iha poténsia bele halo konflitu iha suku, bairu,” nia dehan
 
Diretór ne’e mós afirma, halo identifikasuan ba área risku, la’ós OPS de’it, maibé mós servisu intelijen nian.
 
“Servisu identifikasaun la’ós OPS de’it, maibé mós servisu informasaun nian hanesan intelijensia sira, para bele ajuda komandu para medída sira polisiál nian ba prevensaun sira. Entaun OPS no servisu intelijensia nian ne’e importante tebes,” nia tenik
Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items