Print this page

Vise MI: PNTL iha Lei Disiplinar ba Membru ne’ebé Jura ba KHUNTO

Tempotimor (Dili)-Juramentu ne’ebé partidu KHUNTO hala’o namanas hela, hahú hamosu preokupasaun públiku. Liu-liu tanba, deskonfia iha pesoal membru instituisaun seguransa ne’ebé halo mós juramentu.

Ba kestaun ne’e, Vise Ministru Interior Antonio Armindo ne’ebé reprezenta partidu KHUNTO iha governasaun daualu, hatete, informasaun kona-ba juramentu husi pesoal Polisia Nasionál Timor-Leste ba partidu KHUNTO ne’e nu’udar rumoris de’it.

Tuir nia, rumoris ne’e mosu tanba ema balun ne’ebé la gosta ho partidu KHUNTO mak bobar lia.

"Buat ida deskonfia ne'e normal, tanba situasaun politika balun la gosta malu bele bobar malu, maibé nu’udar lideransa ita-tau atensaun no konsidera issu sira ne'e no tenke tuir regra, nia juramentu duni ou lae provas sei mai husi investigasaun, ne’ebé ita la hatene buat ida duun malu ne'e bele individual mak gosta bobar malu mai to'o iha komisariu i ba to'o iha publiku bele hatene," dehan Antonio hafoin reuniaun ho Komandante PNTL Munisipiu sira iha Komandu Jeral PNTL Kaikoli, Kinta (09/07).

Vise Ministru ne’e dehan, maske hanesan membru partidu KHUNTO, maibé nia parte to’o ohin loron seidauk hatene informasaun kona-ba pesoal PNTL balun halo juramentu ba partidu KHUNTO.

"To'o ohin loron ita la hatene tanba ne'e issu de'it, issu ne'e kualker see de'it bele bobar malu, sa tan iha situasaun ida hanesan dadaun ne'e, ne'ebé ita tenke kuidadu ho situasaun sira hanesan ne'e," dehan nia.

Maske nu’udar rumoris de’it, maibé Vise MI ne’e dehan, karik pesoal PNTL balun halo duni juramentu ba partidu KHUNTO, PNTL iha ninia regras par bele aplika.

"Se loos duni, prontu PNTL iha ninia Lei disiplinar ne'ebé mak foin daudauk aprova no uluk mós iha nanis entaun komandu mak iha papel atu haree nia membru sira," dehan nia.

Rate this item
(0 votes)
Last modified on Friday, 10 July 2020 12:29
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com