Prezidente Komisaun B ne’ebé trata asuntu Defeza no Seguransa, Agostinho Sequeira Somotxo informa, divida naun-finanseira iha instituisaun seguransa ne’e akontese iha V Governu tinan 2013, tempo sekretariu Estadu Francisco Guterres nia ukun.
Somotxo kestiona, tanba iha altura ne’ebá iha ministru lubuk ida mak troka malu hodi kaer instituisaun defeza no seguransa, maibé la konsege rezolve.
"Ami nia komisaun simu orientasaun husi meza (PN) atu bele investiga kazu divida ne'ebé mosu iha instituisaun PNTL iha tinan kotuk liu ba. Ami hanoin kona-ba ida ne'e ami sei tuun direiamente,” dehan Somotxo ba jornalista sira iha Parlamentu Nasional, Kinta (02/07).
Deputadu ne’e sente triste no hakfodak tanba momentu ne'ebá, nia kaer pasta hanesan Ministru Defeza durante fulan 9, maibé la deteta kazu ida ne'e.
"Ha’u hanesan eis ministru defeza sente triste uitoan tanba bainhira ha'u kaer pasta hanesan ministru defeza la identifika kazu ida ne'e, maibé ikus mai komisaun C mak identifika iha relatoriu balun depois rekomenda ba prezidente PN Aniceto Guteres, ho nune'e meza deside fó konpetensia ne'e mai ami atu bele buka tuir kazu ne'e," nia dehan.