Ho nune’e, hafoin Taur simu pose nu’udar Ministru Interior, Ministru Defeza no Seguransa Filomeno Paixão ne’ebé durante ne’e asume kargu Ministru Interior interinu sei entrega serbisu tomak ba PM Taur.
Nia dehan, serbisu ne’ebé nia sei entrega ba PM Taur mak hadia lejislasaun hanesan regulamentu, estatutu no organika hodi garante serbisu profisional ba instituisaun Polisia Nasional Timor-Leste (PNTL).
"Tanba ne'e ohin foin aprova regulamentu disiplinar PNTL nian, tuir mai estatutu no organika, entaun buat hirak ne'e prontu hotu ona, entaun agora Primeiru Ministru Taur Matan Ruak mak toma konta fali (MI) ha’u sei entrega fali par bele halo kontinuasaun," dehan Paixão hafoin reuniaun Konsellu Ministru iha palasiu governu, Kuarta (24/06).
Aleinde ne’e, nia hatete, presiza halo mós revizaun lei ba parte imigrasaun nian atu bele apar ho regulamentu sira.
"Legislasaun barak mós iha imigrasaun no protesaun sivil, lei inan iha ona, agora hela regras ou regulamentu diploma i depois ba imigrasaun ita presiza reve fali sira-nia lei inan ou dekretu Lei sira par bele aserta, nune'e buat barak mak presiza atu halo."
Maske konsidera presiza lori tempu atu hala’o serbisu hirak ne’e, maibé nia hatete, durante nia sai ministru interior interinu nia konsege halo ona buat balun.
"Serbisu hirak ne'e presiza lori tempu, tanba la'os ita lori ulun halo mesak-mesak maibé sempre iha kordenasaun ho Ministeriu Reforma Legislativa Asuntu Parlamentar (MRLAP), entaun durante ne'e husu opiniaun ba ministeriu barak no to'o ikus mai foin mak hetan produtu hirak ne'e," dehan nia.
Tuir nia, preokupasaun boot mak ba PNTL no imigrasaun, tan ne’e nia sujere atu PM tau-matan di’ak liu ba instituisaun refere.
"Rekomendasaun ba Primeiru Ministru, ha’u-nia preokupasaun mak PNTL no Imigrasaun tanba ne'e ha’u husu se bele Primeiru Ministru rasik mak kaer PNTL no Imigrasaun," dehan nia.