Maske Timor-Leste deklara ona livre husi Covid-19, maibé tanba virus ne’e sei sirkula maka’as iha nasaun seluk, liu-liu Indonezia, nune’e TL implementa tan estadu emerjensia (EE) faze datoluk.

Xefe Estadu Maior FALINTIL Forsa Defeza Timor-Leste (F-FDTL) Maijor Jeneral Lere Anan Timur informa, iha implementasaun EE datoluk ne’e, F-FDTL haruka tan nia membru hodi reforsa seguransa iha fronteira.

"Ami reforsa ona ita-nia forsa iha fronteira hodi responde, liu-liu ba Corona Virus. Ami koloka ona forsa iha ne'eba mais efektivu hira ha’u la ko'alia tanba ne’e segredu militar," dehan Maijór Jenerál Lere iha Palásiu Prezidensiál Bairu-pite, Kuarta (27/05).

Lere dehan, komando F-FDTL orienta ba forsa sira iha fronteira atu fokus ba kombate no evita Covid-19 tama iha TL.

"Forsa sira ne'ebe iha fronteira ne'ebá ne'e responde mais liu ba Covid 19, tanba ita-nia maluk sira iha sorin ne'ebá ne'e sira agora afetadu maka'as," dehan Lere.

Maijor Jeneral ne’e husu mós ba Timor-oan sira iha fronteira, inklui seguransa sira atu labele fasilita malu hodi lori ema husi nasaun afetadu tama iha TL.

"Ita lakohi ema ida nia kaprisu mai estraga ema barak. Ida ne'e mak ita-nia komunidade ho autoridade liu-liu iha fronteira ne'ebá ne'e tenke konsiente ba ida ne'e. Ita labele fasilita malu, liu-liu komunidade sira iha Kovalima, Bobonaru no Oekusse. Maske sira mesak familia mais labele. Ita familia entaun fasilita malu, hodi moras ne'e mai da'et tutan ba malu, ne'e labele," nia alerta.

VIDEO PUBLISIDADE APELU HUSI PM TAUR APLAUS BA FRONT LINE