Komadante Tranzitu Munisípiu Dili, Inspetór Domingos Sarmento Gama hateten, lei kódigu estrada 49 alinea G hatete, komunidade sira uza transporte karreta no motor labele para iha trotoar leten.
"Ohin, dia (11/3) ami sei tolera no avizu de'it, maibé apartir husi ohin ba oin atu komunidade ka membru husi instituisaun rua (F-FDTL no PNTL) no Diretór ka funsionáriu ka xefe mós ami sei foti, tanba aplika kódigu estrada artigu 49", dehan nia, iha tasi ibun Palasiu Governu, Kuarta (11/3).
Nia dehan, aplika lei kódigu estrada, tanba trotoar ne'e fó espasu ba komunidade sira ne'ebe la'o ain mak bele uza, la'ós para fali motor ho kareta iha leten, depois ema la'o ain la'o fali iha estrada no dala barak hamosu dezastre.
Nune'e, apela ba komunidade hotu-hotu ne'ebe utiliza transporte karreta no motor labele para tan ona iha trotoar ne'ebe halo ona iha kapitál Dili tomak, kuandu kontinua para iha leten Polisia Tránzitu sei foti hodi tuir medida lei kódigu penál.
Entretantu, hataan ba preokupasaun fatin atu para motor no kareta nian, komadante ne'e hatete, espasu atu para motor ka kareta ne'e kompeténsia kada instituisaun nian, PNTL só implementa mak lei kódigu estrada. (*)