"Ha'u ladun prekupa ho situasaun polítika ne'ebé ita-nia lider sira jere. Kuidadu maka ema seluk bele aproveita situasaun ida ne'e, liuliu oportunista sira," dehan nia, iha Palásiu Prezidensiál, Bairru-Pité, Sesta (7/2).
Eis-gerrileiru ne'e akresenta, se de'it maka moris iha Timor tenke tuir regra no lei. Liuliu timoroan ne'ebé uluk halai ba Indonézia no agora nakonu iha Timor.
Lere foti kestaun nee, tanba lei Indonézia la fó dalan ema Indonézia dupla sidadania, kontrariu ho lei Timor ne'ebé fo dalan atu dupla sidadania.
Nune'e, Jenerál Fitun Rua ne'e hatete, Falintil-FDTL sempre vijilansia atu hasoru kualkér maneira ne'ebé estraga estabilidade nasionál. (*)