Tuir informasaun ne’ebé www.tempotimor.com asesu iha pájina servisu relasaun publika, sesta (12/05) katak, UPM simu Informasaun husi komunidade katak Ró ida hetan problema iha tasi klaran.
“UPM simu informasaun husi komunidade ida naran Hilario hosi ANATL dehan nia hetan kontatu hosi Pilotu Helikopteru Kompañia SANTOS, katak iha Ro ida ho nia distánsia 3 Mill hosi parte Cristo Rei nian hetan problema tanba nia mákina avaria no Ro refere tula mós pasiente balu ho kondisaun moras. Entaun ita mós detekta kedas Ro refere liuhosi nia sistema AIS (Automatic Information System) ne’ebé instala iha Quartel UPM”, esplika Komandante Unidade Polísia Marítima (UPM), Superintendente, Eugenio Pereira, liuhusi telefone iha loron tersa, (09/05).
Nia dehan, hafoin identifika Ro refere nia parte halo kedas koordenasaun ho Ró ambulánsia hamutuk ho mediku sira imediatamente ba kedas iha fatin akontesementu hodi fornese servisu salva marítima nian.
“Ita halo esforsu identifika ro iha tasi klaran no konsege halo salvamento hodi evakua pasiente inklui salva mós Ró refere uza Touch Boat hodi nune bele dada lori mai rai maran”, dehan nia.
Komandante UPM informa tan, pasiénte no pasajeiru sira ho kondisaun di’ak hotu tanba membru UPM sira halo intervensaun ho lalais hodi fornese servisu salva marítimu nian lori sai vítima sira mai rai maran. (*)