Tuir informasaun ne’ebé www.tempotimor.com asesu iha pájina serviços relações públicas (09/05/23) katak, kazu ne’e akontese iha tuku 00:10 madrugada wainhira ekipa Oeste hala’o patrulla iha área Dom Aleixo, to’o iha Area Kampo Alor diresaun tasi ibun, iha grupu joven ida halo pertubasaun orden públiku ka’er fatuk tuda ema sira ne'ebé  fila husi fatin feira ne’ebé  hala’o iha Porto Dili.

Nune’e ekipa servisu ne’ebé lidera hosi Aranha Oeste halo kedas prevensaun hodi hakalma situasaun no halo abordazen ba suspeitu na’in-7 iha tereñu inklui rekolla mós evidénsia sira hanesan vizka ho berlindos no fatuk ne’ebé suspeitu sira uza hodi tuda ema arbiru iha dalan.

Hafoin asegura suspeitu na’in-7, ekipa servisu kontatu kedas ba Delta Base hodi husu apoiu ba patrulla no transporta kedas ba Eskuadra PNTL Dom-Aleixo hodi halo identifikasaun durante hora 12.

Maibé akontesimentu ne’e, laiha vítima ruma mak aprezenta keixa kona-ba sasán estragus no laiha ema ruma kanek. (*)