Tempotimor (Dili)-Vise Minístru Interiór (VMI), António Armindo sei aprezenta lista kandidatu Komandante Jerál Komandu Polísia Nasionál Timor-Leste (PNTL) ba Konsellu Minístru (KM) iha loron 12 fulan-marsu tinan ne'e.

"Ha'u hanoin iha dia 12 agora, tanba dia 27 tenke tomada de posse, atu komandu no ministériu mós hatene ona se mak ba e preparasaun ba iha loron espesiál ne'e mós presiza esforsu presiza planu halo di'ak, tanba ita mós konvida konvidadu husi nasaun viziñu sira", dehan nia iha palásiu governu, kinta (09/03).

Lista sira ne'ebé atu aprezenta ba Konsellu Minístru kandidatu sira mai husi membru polísia nasionál ne'ebé ativu hela.

"Naturalmente polísia, ema sivil la iha", nia dehan.

Governu sei nomeia, membru PNTL ho díviza superintende xefe sira ne'ebé prense rekézitu tinan haat ba leten tuir ona formasaun.

Tanba, lei estatutu PNTL mós la ko'alia katak, tenke nomeia fali segundu komandante jerál PNTL hodi substitui atuál komisáriu Faustino da Costa. (*)