Print this page

Laiha Kajerna Membru PNTL Baukau Kalan Toba iha Sela Laran

By February 21, 2023 3468
Komadante Komandu PNTL Munisípiu Baukau, Superintendente António De Sa, ko'alia hela ba mídia iha kna'ar fatin vila nova, tersa (21/02) Komadante Komandu PNTL Munisípiu Baukau, Superintendente António De Sa, ko'alia hela ba mídia iha kna'ar fatin vila nova, tersa (21/02) Foto Tomas Freitas

Tempotimor (Baukau)-Membru Polísia Nasionál Timor-Leste (PNTL) ne'ebé husi Munisípiu seluk hala'o servisu seguransa nian iha Munisípiu Baukau, tempu kalan toba iha sela detensaun, tanba laiha kajerna.

Komadante Komandu PNTL Baukau, Superintendente António De Sa, esplika, membru PNTL ne'ebé dadaun hala'o servisu seguransa nian iha Munisípiu Baukau, laiha kajerna ba membru sira, nune'e obrigatóriu kalan tenke toba iha sela detensaun, wainhira laiha detidu ruma.

"Kajerna laiha entaun dala barak sira okupa fali sela detesaun, haree sela mamuk laiha detidu ruma, polísia mak okupa fali, ida ne'e hahú husi komandu to'o kedas eskuadra sira", dehan nia iha kna'ar fatin vila nova, tersa (21/02).

Maske iha kajerna antigu hamutuk 43, ne'ebé iha tempu okupasaun Polísia Indonezia husik, dadaun sai ona inventáriu ba Instituisaun PNTL nian, maibé hetan okupasaun husi komunidade, inisiu Timor ukun aan to'o ohin loron.

Nune'e Komandu PNTL Baukau hamutuk ho Vise Minisru Interior inklui Asesór Prezidente da Repúblika halo ona esforsu balun, halo dialogu ho komunidade sira, maibé la-dauk iha solusaun, nune'e Komandu PNTL Munisípiu aprezenta ba iha Nasionál, atu solusiona.

"Foin lalais avaliasaun integradu instituisaun PNTL ho Ministériu Interiori ha'u konsege foti kestaun ne'e, tanba inventáriu ba instituisaun PNTL nian, ita prezisa duni", nia akresenta

Husu Governu, liu-liu Ministru Interior atual Primeiru Ministru, Taur Matan Ruak, atu tau ba konsiderasaun hodi konstrui kajerna ba membru PNTL ne'ebé servisu iha Eskuadra PNTL Postu, no rezolve preukupasaun komunidade sira ne’ebé okupa kajerna PNTL nian iha resintu Komandu nian.

Tanba servisu PNTL tenke profesionál, Governu mós presiza investe kondisaun infraestrutura dignu ba membru sira, nune'e garante saúde di'ak.

"Polísia ema la'os robot, entaun nia fizikamente saúde ne'e tenke preparadu kondisaun di'ak, maibé uma ba sira laiha ne'e problema boot bele halo sira moras, tanba kondisaun toba fatin la-di'ak, oinsa sira atende problema ruma", nia argumenta

Entretantu Munisípiu Baukau iha Postu Administrativu 6, edifisiu Eskuandu PNTL 6, no Ofisial Polísiamentu Suku (OPS) 59, tanba destaka tuir Suku 59. (*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items