Enkuantu eskola ne'ebé Komandu PNTL Bobonaru, koloka nia membru hodi fó seguransa, mak hanesan, eskola Ensiñu Sekundária Jerál (ESG-sigla portugés) númeru 1 Dom Martinho da Costa Lopes Maliana no eskola tekníu vokasionál númeru 2 Malibaka Yamato lokaliza iha SoSo, Maliana.
Komandante PNTL Munisipiu Bobonaru, Superintendente Polísia, Antoninho Mauluta, hatete, komandu koloka membru na'in-2 atu garante seguransa ba prosesu aprendizajen.
"Bazeia ba pedidu ne’ebé tama mai ami, ohin ita halo koordenasaun ho eskola sira hodi kria sistema seguransa no-mós koloka ofisiál polísia na'in-2, intrega direita ba iha eskola Dom Martinho no eskola Malibaca, hodi halo koordenasaun servisu ho diretór eskola no profesor sira hodi kontrola situasaun seguransa iha eskola 2 refere", esplika Komandante Mauluta, ne'ebé www.tempotimor.com sita iha pajina ofisiál Servisu Relasõens Públikas, Sesta (03/02).
Prezensa membru polísia nian ba eskola refere, atu halo seguransa no prevensaun, tanba deskonfia poténsia ba konflitu.
Durante ne'e, PNTL Bobonaru identifika eskola-2 ne’e, sempre mosu konflitu ne'ebé entre estudante ho estudante no ema husi liur ho estudante iha prosesu aprendizajen.
"Tanba ne’e ita nomea membru na'in-2 ne'e oinsá bele asegura situasaun, wainhira estudante sira mai eskola karik bele sente seguru, tanba daudaun Dom Martinho nia estudante balu ta'uk de'it situasaun, lakohi mai tiha ona eskola", nia afirma.
Komadante PNTL Bobonaru mós, fó korajen ba estudante sira atu estuda, la'os buka halo problema, tanba eskola mak fatin ne'ebé atu aprende no buka matenek.
Husu membru ne'ebé destaka, atu halo kontrolu rútiña molok estudante sira hala'o prosesu aprendizajen, nune'e wainhira akontese problema ruma, bele identifika lalais autór sira-ne'ebé tenta perturba prosesu aprendijasem. (*)