Komandante Komponente Aéreo, Tenente Koronel, Helder da Costa, hatete, Komandante Komando Indo-Pasífiku EUA Almirante John C. Aquilino ne'ébé hetan konvite husi Komponente terestre primeiru battalaun atu partisipa loron transformasaun FALINTIL ba F-FDTL ne'ebé monu iha loron 02 fulan-fevereiru, no uza oportunidade refere atu haree mós material ne'ebé fó apoiu ba F-FDTL Komponente terestre primeiru battalaun lanud Baukau.

"Mais felizmente ohin ita hotu hatene nia mai duni mais lakonsege tuun, tanba situasaun mak hanesan ne'e ita nia metrolójia labiban para nia tun, tanba ne'e nia dehan, fila fali ona ba Dili, nia programa mai ne'e atu haree sasan ne'ebé sira fó tinan hirak liubá, depois mai haree fatin ne'ebé tuir planu sira konstrui sentru operasaun ba dezasrte naturál nian", dehan nia iha aeroportu lanud Baukau, Sesta (03/01).

Tuir komunikadu Imprensa ne'ebé www.tempotimor.com asesu iha loron Sesta (03/02) katak, Komandante Komando Indo-Pasífiku EUA sei vizita aeroportu Lanud Baukau hamutuk ho Xefe Estadu Maiór Jenerál FALINTIN-Forsa Defeza Timor-Leste (F-FDTL), Tenente Jenerál Falur Rate Laek, Ministru Defeza Filomeno Paixão, no Enkarregadu Negósiu EUA Tom Daley, atu anunsia apoiu foun EUA nian ba Forca Defeza no reabilitasaun konjunta ba aeroportu Baukau.

Tanba EUA liuhusi Komando Indo-Pasífiku nian, kompromete ona millaun US$4.5 atu apoia operasaun Komponente Aéreu F-FDTL nian, inklui estasaun metereolójika automatizadu ida, ambulánsia, forklift, pesa sira no formasaun, no millaun US$1 ba finansiamentu militár estranjeiru bazeia ba pedidu husi Governu Timor-Leste atu sosa kilat ki'ik sira hodi hasa’e kapasidade profisionál F-FDTL nian.

EUA mós halo ona kompromisu ho montante totál millaun US$23-resin hodi reabilita Aeroportu Baukau ho Governu Timor-Leste.

Iha tinan 2022, Estadus Unidus Amérika no Timor-Leste kompleta ona faze dahuluk ba reabilitasaun aeroportu Baukau liuhusi asegura aeroportu refere, ho lutu perímetru foun ida, hari’I armazén ida ba Komponente Aéreu F-FDTL, no fornese ekipamentu foun ba apoiu aeroportu, inklui kamiaun kombustível no bombeiru ida.

Tinan ida ne’e, Estadus Unidus Amérika no Timor-Leste sei hahú faze daruak ba reabilitasaun konjunta liuhusi pinta fila-fali pista aeroportu nian, instala iluminasaun pista utiliza enerjia solar, no konstrui hangar ida ba aviaun Cessna.

Nune'e mós antes tinan 2023 remata, EUA sei fornese aviaun Cessna viziliánsia modernu ida ba F-FDTL, hanesan parte husi parseria seguransa entre EUA ho Timor-Leste, tanba EUA hala’o ezersísiu militár anual hamutuk 3 ho F-FDTL, alende mós fasilita ona membru militár F-FDTL lubuk ida ba EUA hodi tuir formasaun lian Inglés no edukasaun militár profisionál.

Forsas Navál Seabees EUA mós, halo ona konstrusaun no reabilita ona projeitu hamutuk 100-resin, ne'ebé kompostu husi edifisiu klínika no eskola iha teritóriu laran ho valór orsamentu millaun US$60-resin.

Nune'e mós EUA liuhusi Komando Indo-Pasífiku fornese ona osan millaun US$2.3-resin ba konstrusaun fasilidade saúde foun sira iha Dili, Baukau no Batugade, atu hametin seguransa saúde ba tempu naruk nian. (*)