Komandante PNTL Munisípiu Dili, Superientendente Xefe Polísia, Natercia Eufrasia Martins Soares hatete, konfrontu ne’e entre membru Grupu Arte Marsiais (GAM) Persaudaraan Setia Hati Terate (PSHT) no Grupu Arte Rituál (GAR) 77 iha Suku Maskariñas, Postu Vera Crus, Munisípiu Dili.

“Konfrontu entre organizasaun arte marsiais PSHT no ritual 77 iha área Maskariñas hafoin grupu 77 ba hakoi nia maluk (matebian) ida depois fila mak mosu akontesimentu ida ne’e, iha altura ne’ebá Polísia halo intervensaun, eh la iha autór ida mak ita ka’er, tanba depois sira halo tiha agresaun sira husik fatin ne’e ho lais”, dehan nia ba média iha Sentru Formasaun Polísia (CFP) Comoro, tersa (24/01).

Kona-ba motivu husi akontesimentu, sei halo prosesu investigasaun hafoin bele identifika, tanba vítima husi arte rituál 77 hato’o ona keixa ba Komandu PNTL Munisípiu Dili.

“Maibé ita hatete loloos katak, ida ne’e grupu rua, husi grupu ritual 77 no arte marsiais PSHT”, nia dehan.

Nune’e, Eskuadra PNTL Vera Cruz parte investigasaun halo ona prosesu atu kontinua ba identifikasaun autor sira.

“Vítima sira horkalan hakbesik ona ba iha Komandu Polísia hato’o ona informasaun balun no autor balun ne’ebé sira (vítima) koñese ida ne’e tama ona iha prosesu no ohin eskudra husi Vera Cruz parte investigasaun halo ona prosesu eh komandu kontinua halo identifikasaun liuhusi vítima no testemuña sira ne’ebé aprezenta aan no sei komunika ba Ministériu Públiku atu hetan mandadu detensaun hodi buka autor sira ne’ebé mak konsege halai husi polísia nia operasaun”, nia

PNTL mós rekolla ona arma branka balun ne’ebé membru PSHT lori estraga membru arte 77 nia motorizada tolu hodi submete ona ba prosesu.

“Ami mos la taka dalan ba vítima sira ne’ebé mak sasan lakon atu hakbesik aan ba iha komandu Munisípiu atu aprezenta, no bele aprezenta mós dadus ruma karik sira koñese pesoal ka individu ruma komete konfrontasaun ne’e hodi ajuda komandu atu buka tuir sira hodi responsabiliza ba sira nia aktus”, nia informa. (*)