Porta Voz Polísia Nasionál Timor-Leste (PNTL), Superintende Xefe Arnaldo Monteiro informa, bainhira mosu problema ruma iha komunidade nia leet bele kontaktu ba númeru emergensia husi Polísia Nasionál Timor-Leste (PNTL).
"Kuandu mosu problema ruma iha ita boot sira nia oin, ami husu labele haluha mai informa iha PNTL, ne’ebé besik ou bele liuhusi númeru telefone 3331283/3311380 númeru ne'e fixu ba ita boot sira bele kontaktu bainhira iha insidente ruma", nia dehan iha Komando Jerál PNTL Kaikoli Kuarta, (11/01).
Husu mós ba públiku atu labele pániku, lalika ta'uk lno hakfodak ho situasaun, tanba PNTL prontu atu asegura durante oras 24 nia laran.
"PNTL hakarak informa ba komunidade sira liuhusi Porta Voz, hato'o katak situasaun enjerál iha Dili durante ne'e la'o hakmatek no kontroladu, situasaun husi rai no tasi hotu la'o di'ak la iha buat ida mak afeita ba situasaun enjerál", nia informa.
Nune’e, komunidade sira bele kontinua hala'o nia atividade hanesan baibain, tanba postu PNTL iha fatin hotu prontu atu simu informasaun hodi asegura komunidade sira.
Tanba, problema omesidu ne'ebé dadaun la'o hela la afeita ba situasaun enjerál iha Munisípiu Dili. (*)