Tuir Portavoz Komandu Jerál PNTL, Superintende Xefe Arnaldo Monteiro, katak, sidadaun estranjeiru na'in-tolu (3) inklui Timoroan-ida (1) agora detein ona iha sela detensaun Munisípiu Dili hodi prosesa primeiru interogatóriu.
"Iha prosesu ne'e, ekipa investigasaun kriminál no ekipa inspesaun identifika autór na'in-haat ne'ebé sai autor prinsipál ba atividade esplorasaun jogu ilegál Toto bola iha área Delta Comoro, autor sira ne'e investigadór aplika detensaun fraglante delitu ba prosesa primeiru interogatóriu, autor sira ne'e ho naran inisiál GLG ho idade 53 husi sidadaun Xina, HL ho idade 50 husi Sidadaun Xina, DI ho idade 48 husi Indonézia, no AMAF ho idade 31 husi Timor-Leste no sidadaun sira agora iha hela sala detensaun Munisípiu Dili no ohin ka aban sei aprezenta ba primeira interogatóriu", dehan nia liuhusi iha Komandu Jerál PNTL, kaikoli, kuarta (23/11).
Tanba, iha loron 21 fulan-novembru 2022, oras 17:30, ekipa inspesun husi Ministériu Turizmu Komérsiu no Industria (MTKI) halo inspesun ba jogo Toto bola online ba kompaña Funspot Unipessoal Lda no ikus mai deskobre atividade ne’e, laiha lisensa.
"Iha prosesu inspesun ne'e, ekipa Ministériu Turizmu Komérsiu no Industria MTKI deskobre kompaña Funspot Unipessoal Lda, loke Toto bola sem lisensa, kompaña mós lokaliza nia atividade sem lisensa husi espozisaun jogu iha fatin tolu ne'ebé iha kapitál Dili", dehan nia.
Nune'e, ekipa Inspesun husi MTKI entrega kazu jogu ilegal ne'e ba Departamentu Investigasaun Kriminál (SIK) hodi halo fraglante Delitu no entrega mós objetu seluk ne'ebé kompaña utiliza hanesan komputador, TV Screen, Osan no Router.
Atividade ilegál nu'udar auto krime iha artigu 322, Kodigu Penal, ne'ebé ko'alia kona-ba esplorasaun jogu ilisítiu. (*)
