Komandante Eskuadra Kristu Rei, Inspetor da Polísia Duarte Abilio, hatete, halo sosializasaun kona-ba Prevensaun Konflitu iha Suku Balibar hodi fahe informasaun ba komunidade sira atu labele mete problema ne'ebé antes ne'e akontese iha Suku Dare Postu Vera Kruz.
"Ha'u ho segundu Komandante no estrutura tomak konvoka sorumutu ida atu fahe informasaun kona-ba situasaun ida ne'ebé akontese iha loron hirak ba kotuk ho ida ne'e mak ohin ami hasoru no konvoka duni iha suku Balibar", dehan nia iha Sede Suku Balibar, kinta (10/11)
Nune’e, iha sosializasaun prevensaun konflitu ne’e, hetan partisipasaun masimu husi joven no inan aman sira.
Sosializasaun ne’e mós ho hanoin atu halo antesipasaun ba akontesimentu ne'ebé joven ida lakon vida iha loron (02/11) atu labele da'et to'o iha suku Balibar.
"Problema ne'e akontese, labele mai da'et to'o iha Dili Balibar área Kristu Rei Postu administrativu Kristu Rei tomak", nia dehan.
PNTL sei kontinua mós halo sosializasaun ba komunidade sira iha area Kristu Rei nian hanesan Suku Ailook, Kamea no Bekora iha tempu badak.
Sorin seluk, Administradór Postu Administrativu Kristu Rei, Venancio Tavares, hatete, autoridade lokal ho seguransa fo sosializasaun ba komunidade iha suku Balibar atu labele mete problema husi Viziñu sira.
"Ativida ohin (10/11), ami nia hanoin atu prevene, la'ós dehan iha suku Balibar ne'e iha problema lae, Problema ne'e akontese iha kraik ne'ebá (Dare) hanesan autoridade lokal, ami tenke halo enkontru ida hanesan ne'e atu hatene katak, komunidade sira la'o livre ka lae, tanba keta sira trauma karik ita la hatene", afirma nia
Nune'e, autoridade no parte seguransa husi Postu Administrativu Kristu Rei hakbesik-aan ba komunidade sira atu fo sosializasaun liuliu halo prevensaun ba sira labele mete problema ne'ebé husi suku sira seluk.
"Ema seluk halo sala ita labele halo sala, entaun ami hanesan autoridade lokal hamutuk ho ami nia seguransa fo hanoin ba komunidade oinsá prevene problema", nia akresenta
Nune'e, autoridade lokal no seguransa mós motiva komunidade sira atu labele trauma, tanba komunidade sira la halo sala no la mete problema ne'ebé akontese foin lalais ne'e.
Eventu sosializasaun prevensaun iha suku Balibar ne'e partisipa husi Koordenador Organizasaun PSHT no Reprezentante Arte Rituias 77, Inan ho Aman no Juventude sira husi Suku Balibar. (*)
