Komandante PNTL Munisípiu Dili, Superentidente Xefe Henrique da Costa hatete, insidente iha Lurumata joven sira halimar hamutuk mak sona malu hodi rezulta vítima Aires Selestino Adelaide idade 19 lakon vida.

Kazu insidente Suspeitu ho inisiál JPP sona vítima Aires Seletino Adelaide idade 19, iha loron 06 novembru porvolta tuku 08:00 kalan, iha área Lurumata, aldeia 03, Suku Fatuhada, Postu Administrativu Dom Aleixo, Munisípiu Dili.

“Suspeitu ho insiál JPP ho evidénsia hanesan tudik, sona Vítima Aires Seletino Adelaide idade 19, dadaun ne’e ita asegura no detein ona iha eskuadra Polísia Dom Aleixo hodi submete ba prosesu investigasaun”, dehan Henrique iha kna’ar fatin Kaikoli, segunda (07/11).

Tuir informasaun prelimináriu husi suspeitu JPP katak, suspeitu ho vítima Aires Seletino Adelaide kolega di’ak sempre halimar hamutuk, maibé iha iha loron 06 fulan-novembru porvolta tuku 08:00 otl kalan sira sona malu.

“Iha informasaun prelimináriu ne’ebé ita hetan ne’e Suspeitu JPP ho Vítima Aires Seletino Adelaide nu’udar kolega di’ak halimar hamutuk, maibé derepente hodikalan sira sona malu, tanba ne’e ita-nia investigadór sira sei halo investigasaun ba suspeitu JPP, hafoin bele hatene lolos motivu husi insidente ne’e”, esplika nia.

Momentu akontesimentu ne’e, família balun halo evakuasaun ba vítima Aires Seletino Adelaide ba Ospital Nasional Guidu Valadares (HNGV), atu hetan tramentu, maibé lakonsege salva nia vida.

“Vítima Aires Seletino Adelaide nia isin mate dadaun sei iha mortuariu HNGV hodi submete ba prosesu autopsia, maibé suspeitu ita detein iha eskuadra Polísia Dom Aleixo atu halo Investigasaun”, dehan nia.

Tuir informasaun suspeitu ho vítima hemu hamutuk tua mak akontese insidente sona malu, maibé sei iha prosesu invetigasaun nia laran, sira konsumu tua ka la’e orsida remata invetigasuan foin bele hatene nia kronolojia.

“Ita-nia parte investigadór sira sei halo hela investigasaun, tan ne’e ita la bele dehan katak sira hemu alcholl ka lahemu mak akontese insidente ne’e, maibé tuir informasaun ne’ebé ita hetan husi inisiu ne’e, sira na’in-rua kolega di’ak halimar hamutuk”, afirma nia.

Tanba ne’e, komandu PNTL Munisípiu Dili apela ba joven no públiku tomak halimar ho sasán kroat ne’e perigozu, nune’e mós dala ruma krime ne’e barak akontese, tanba sira koñese malu.

“Ha’u hakarak hatete, seguransa ne’e la bele depende ba Polísia no la bele depende ba ema seluk, maibé ita garante katak ita-nia an mós tenke seguru no ita mós iha grupu ne’ebé mak iha família, ita tenke promove paz no estabilidade, ita la bele hein polísia no Militar mak bele asegura hotu ne’e la’e, filafali ida-idak nia-an”, hatete nia. (*)