Print this page

Konfrontu iha Dare Uma ho Motorizada Hetan Estragu

By November 08, 2022 470
Konfrontasaun ne’ebé akontese iha Dare. Konfrontasaun ne’ebé akontese iha Dare. Foto Suplay

Tempotimor (Dili)-Konfrontu Grupu Joven sira iha área Fatunaba, Suku Dare, Postu Administrativu Vera Kruz, Munisípiu Dili, rezulta komunidade nia uma ida ho motorizada ida hetan estragu.

Komandante PNTL Munisípiu Dili, Superintendente Xefe Henrique da Costa hatete, konfrontu grupu GAM ho GAR ataka malu akontese iha domingu (06/11) loraik konsege harahun uma komunidade ida no motorizada ida hetan estragu iha fatin akontesimentu.

Kazu ne’e, akontese iha tuku 17:00 loraik, bainhira halot mate isin Clementino Borges matebian husi konfrontu iha suku Dare, iha semitériu Públiku Bekussi, bainhira fila husi rate mak mosu asaltu malu entre grupu rua iha área Lahane nian besik Palásiu Nobre, nune’e  harahun uma ida no motorizada ida.

“Horseik hakohi matebian Clementino Borges iha Dare fila mak iha grupu rua ataka malu no husi akontesimetu ne’e konsege rezulta sidadaun ida nia uma vidru janela rahun nomós motorizada ida hetan estragu”, dehan Henrique iha kna’ar fatin PNTL Kaikoli, segunda (07/11).

Iha akontesimentu ne’e, ekipa konjunta ne’ebé kompostu husi  Polísia Eskuadra Vera Cruz, Unidade Polísia Espesiál (UEP), Batalão Orden Públika (BOP), Forsa Reserva Taks force no hetan tulun husi Polísia Militár (PM), halo kedas intervensaun ba situasaun iha fatin refere.

“Atu prevene provokasaun iha fatin ne’ebá, entaun agora ita koloka ona ita-nia patrolla Eskudra Vera Cruz no Nain Feto Uunidade Espesiál, Task force ka forsa rezerva hodi halo kontrolu fatin ne’ebá”, informa nia.

Akontesimentu ne’e, Autoridade seguransa la kaptura no detein suspeitu ruma, maibé PNTL buka tuir hela suspeitu sira.

“Horseik ita la detein ema ida, maibé iha informasaun prelimináriu ita rejista komunidade nia uma ida ho motorizada ida mak hetan estragu no suspeitu sira agora ita kontinua buka tuir hodi halo kapturasaun”, afirma nia.

Alende ne’e komandu PNTL Munisípiu Dili mós dadaun koloka ona postu polísia temporáriu iha suku Dare hodi garante seguransa ba komunidade sira atu halo movimentu livre.

“Agora iha koloka ona postu polísia temporáriu ida iha Suku Dare nia atu garante seguransa ba movimentu komunidade nia livre labele iha ameasa nia laran, nune’e mós ita komesa ona halo komunikasaun ho autoridade lokál no líder arte Mariál hodi kontrola sira-nia membru”, hatete nia. (*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com