“Iha loron 02 Fulan Novembru ne’e ita rejista insidente 5 no Asidente Trafégu hamutuk 5, ida mate iha kapital Dili iha selebrasaun loron Finadu”, dehan Komandante PNTL Munisipiu Dili, Superintendente Xefi Polisia Henrique da Costa iha kna’ar fatin, kaikoli, Segunda, (07/11).

Kazu insidente 5, akontese hotu iha área Postu Administrativu Dom Aleixu, Munisipiu Dili, inklui kazu ida asaltu malu iha semiteriu publiku Kakaulidu, bainhira familia matebian sira ba tau aifunan iha rate.

“Kazu grupu joven sira asaltu malu iha semiteriu kakaulidu ita halo identifikasuan konsege kaptura ema na’in-4 hodi ba halo prosesu investigasaun no vítima evakua kedas ba iha Hospital hetan tramentu saude”, nia afirma

PNTL mós rejista asidente 5 inklui ida mate iha área Kaikoli nian, tanba soke kareta, bainhira parte Polisa Tranzitu to’o iha fatin kontaktu ba kareta ambulansia evakua ba HNGV, maibé lakonsege salva.

“Hanesan ha’u dehan, iha asidente trafégu ne’e, ema ida mak mate, maibé restu kanek kaman no balun todan i hirak ne'e mak ita rejista iha loron Finandu,” nia relata

Entretantu kazu asidente trafégu ne’e akontese iha loron 02/11 tuku 11:00 Otl, involve iha entre kareta ho motor soke malu iha área Bombeiru Kaikoli nia oin hodi rezulta vítima Domingos Soares idade (25) evakua ba HNGV, maibé lakonsege salva vida.

Durante selebrasaun loron matebian, PNTL Munisípiu Dili hetan apoiu masimu husi Konsellu Polisiamentu Komunitariu (KPK), iha semiteriu Publiku no misa iha igreja, maske iha insidente no asidente balun akontese, maibé situasaun la’o diak ho hakmatek iha ambiente paz. (*)