Ispetor Jerál Komandu PNTL, Superientedente Xefe Carlos Jerónimo, hatete, kona-ba atu demite membru na’in-9 ne’e, sidauk bele fó informasaun, tanba sidauk iha provas sufisiente no prosesu la’o hela.
"Ha'u labele fo ida-ne'e, tanba ita nunka bele mehi buat ida, ita presiza iha depois de faktus sira ne'e hotu, apuramentu ne'e halo nusa, entaun husi apuramentu mak sei haree analiza didi'ak depois oinsá, prosesu krime nian karik aprezenta ba Ministériu Públiku ne'e prosesu ida, eh prosesu indisiplinár ne'e la'o nafatin," nia informa iha komandu jeral PNTL Kaikoli, kuarta (26/10).
Tanba, prazu ba membru na'in-9 ne'ebe hetan suspesaun preventive to'o loron 60, maibé depende ba prosesu identifikasaun la konklui mak posibilidade sei estende tan.
"Prazu ba ida-ne'e loron 60 no fó supensaun ida ba sira atu submete ba prosesu, mais ne'e seidauk iha desizaun disiplanar, buat ida submete ba prosesu ne'e ita bolu suspensaun preventiva to'o loron 60, kuandu prosesu la remata, bele estende tan ho tempu ne'ebé hanesan mak 60 dias, ne'e depende, kuandu hotu, entaun aprezenta," dehan nia iha komandu jeral PNTL Kaikoli, kuarta (26/10).
Maske, relasaun ho kazu ida-ne'e parte Providoria Diretu Umanu no Justisa (PDHJ) konklui ona prosesu investigasaun no ofisialmente sei públika relatoriu investigasaun iha loron 27 fulan outubru tinan 2022.
Maibé PNTL haree relatoriu ne'ebe PDHJ produz mos sei la ses husi prosesu ne’ebé PNTL hala'o hela.
Kona-ba posibilidade atu hasai mos membru na'in-9, PNTL lakohi fó komentariu, tanba PNTL rasik nunka mehi atu nia membru hirak-ne'e hetan demisaun.
Aleinde prosesu ne'ebe PNTL halo hela mos, la'os prosesu krime ne'ebe atu haruka bá Ministériu Públiku, maibé nu’udar prosesu disiplinár no felismente prosesu seidauk konklui, atu bele aprezenta ba Konsellu Superior hodi foti desizaun. (*)