"Ha'u aproveita mós iha Portugál ko'alia barak kona-ba ida ne'e, kuaze fulan tolu ikus Timoroan ne'ebé tama iha Portugál liu ema rihun lima (5.000) situasaun sira ne'ebé dalaruma ita nia maluk sira toba iha Jardin," dehan nia iha Vila Verde, kinta (20/10)

Maibé, dadaun embaixada Timor-Leste iha Portugál halo ona esforsu atu buka kondisaun ba sidadaun Timoroan sira ne'ebé hakarak ba servisu iha estranjeiru hanesan Portugál, Irlandia no Englaterra.

"Lori sira sai husi jardin ba fatin ne'ebé iha kondisaun, balun identifika ona emprezariu sira iha ne'ebá atu haruka sira servisu iha ne'ebá no kuaze 700 ba ona fatin sira ne'e", nia informa.

Maske, Governu esforsu buka ona servísu ba sidadaun Timoroan hirak ne'ebé toba iha Jardin, maibé sidadaun hirak ne'e lakohi atu servisu iha Portugál.

"Governu Portugál fó ona servisu, ne’ebé servisu ba kompaña no sira kada oras ida hetan Euro haat (€4) depois sira servisu tiha oras ida ka rua sira lakohi tiha fali e depois sira hateten, sira nia serbisu ne'e la merese ba ami," nia haktuir.

Alende ne'e, sidadaun hirak ne'ebé durante hetan moras Governu Portugál ho Embaixada Timór-Leste fasilita no lori ona ba Hospital hodi hetan tratamentu.

Governu Portugál, iha hanoin di'ak ba sidadaun Timoroan hirak ne'e, hodi fasilita servisu ba sira ne'ebé hakarak servisu iha Portugál no nasaun seluk tan. (*)