Print this page

Kadetes F-FDTL Foun 600 Prepara Rasik Lojistika

Xefi Estadu Maiór Jenerál F-FDTL, Tenente Jenerál Domingos Raul “Falur Rate Laek”. Xefi Estadu Maiór Jenerál F-FDTL, Tenente Jenerál Domingos Raul “Falur Rate Laek”. Foto Suplay

Tempotimor (Dili)-Xefi Estadu Maiór Jenerál, FALINTIL-Forsa Defeza Timor-Leste (F-FDTL), Tenente Jenerál Domingos Raul “Falur Rate Laek” hateten, komandu F-FDTL hasoru difikuldade lojistika, tanba ne’e kadetes foun 600 prepara rasik sira nia konta bankaria ho nesesidade baziku.

Nia dehan, komandu F-FDTL iha difikuldade ba lojistika, tuir lolos ne’e iha loron 12/09 ne’e inkorpora ona kadetes foun 600 ba iha sentru instrusaun komandante Nicolau Lobato Metinaru, tanba ne’e haruka sira ida-idak prepara dokumentu konta bankaria ho sasan nesidade baziku rasik hodi uza.

“Tuir lolos inkorpora ona membru F-FDTL foun 600 iha loron 12/09, maibé iha difikuldade balun kona-ba lojistika nia, entaun sira ida-idak prepara dokumentu loke konta bankaria ho sasan nesidade baziku rasik iha semana oin loron 20/09 ita inkorpora ona sira tama iha instituisaun F-FDTL atu hahu sira nia trinamentu, tanba sira tama labele sai ona, prepara ida ne'e mak dada to’o 20/09 ne'e, depois iha falla tekniku ruma ne'ebé naran duplikadu, naran balun lalos hadi’a hotu foin liu,” dehan Falur iha Parlamentu Nasionál, kinta (15/09).

Komandu F-FDTL preparadu  ona atu simu kadetes foun hamutuk 600 kompostu husi feto 65 no mane 535 selesionadu ona iha tinan 2022, tanba ne’e 20/09 sira sei inkorpora tama iha sentru instruisaun komandante Nicolau Lobato Metinaru hodi tuir treinamentu minimu fulan tolu no masimu fulan neen (6).

“Agora ita preparadu hotu ona kadetes foun sira sei aprezenta aan iha loron 19/09 iha kuartel jeneral F-FDTL Fatuhada no iha loron 20/09 dader ita hahu lori sira ba iha Sentru Instrusaun komandante Nicolau Lobato Metinaru sei tuir treinamentu minimu fulan tolu no masimu mak fulan 6 sei aprende kona-ba regra Militar nian,”nia afirma

Molok ne’e, komisaun rekrutamentu kadates foun Falintil Forsa Defeza Timor-Leste (F-FDTL), anúnsia ona rezultadu finál kona-ba prosesu teste ba kandidatu foun hamutuk na’in 600 mak selesionadu, hodi inkorpora ba instituisaun militár iha 20 setembru iha sentru Treinamentu Metinaru.

Segundu koordenadór jerál ba Komisaun Rekrutamentu, Tenente Coronel, Mario Baptisa “Bersama” hateten, prosesu teste ne’ebé sira hala’o ba aplikante sira durante fulan ida nia laran, hahú husi 25 jullu to’o 25 agostu, konklui ona, no parte komisaun rasik mós, halo ona avaliasaun finál ba rezultadu teste sira ne’e hotu.

Rezultadu ne’ebé parte komisaun rekrutamentu, entrega ona rezultadu ba Ministru Defeza (MD), Filomino da Paixão de Jesus, no Xefe estadu maiór jenerál F-FDTL, Tenente Jenerál Domingos Raúl “Falur Rate Laek” hetan ona aprovasaun no kandidatus foun F-FDTL hamutuk 600 mak admitidu atu tama iha instituisaun Militar.

“Dokumentu ba kandidatu F-FDTL foun hetan ona aprovasaun final no 600 pesoas feto no mane, ne’ebé aptus ka pasa iha teste ne’ebé halo iha Metinaru no sira sei inkorpora iha Metinaru, tuir data ne’ebé fó sai katak, iha dia 20 de Setembru, sira sei tama iha Metinaru atu hahú sira nia treinamentu,” nia dehan

Tanba ne’e, Xefi Gabinete Ministru Defeza ho Xefi estadu maior Jenerál F-FDTL, aprova ona kandidatu hamutuk na’in 600 ne’ebé, komisaun rekrutamentu submete no komisaun mos fó prioridade ba feto, tanba haree igualidade ba jéneru, nune’e tenke iha balansu, tanba iha tinan ida ne’e, bazeia ba teste feto hamutuk ema na’in 65 (10,5%) no mane hamutuk 535 (89,5%) mak sei inkorpora ba iha instituisaun Militar. (*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com