Komandante PNTL Munsípiu Dili, Superintendente Xefe Henrique da Costa hatete, komandu PNTL Munisípiu Dili iha semana ida ho balun iha fulan-setembru ne’e rejista kazu asidente trafégu akontese iha balu kanek kaman, kanek grave no iha mós lakon vida.

“Ita iha semana ida ho balun hahu iha loron 04 to’o 11 ita rejista kazu asidente trafégu hamutuk 19 rezula ema ida mate no na’in-4 kanek grave iha área juridiku munisípiu Dili”, dehan Henrique iha kna’ar fatin PNTL kaikoli, tersa (13/09).

Tanba ne’e, komandu PNTL Dili mós husu ba sidadaun iha Dili, bainhira konduz motorizada ho karreta tenke kontrola kondisaun transportes halai ho velosidade ida naton, tanba kapitál Dili volume ba moviementu transporte ne’e ho númeru boot.

“Ita husu atu sidadaun hotu tenke iha konsiénsia hadomi ita-nia vida, bainhira konduz transportes karreta no motorizada iha estrada públiku  halai ho velosidade ida naton, tanba ita ema la fa’an iha loja hanesan karreta ho motorizada sira, tanba ne’e halai ho kuidadu”, afirma nia.

Alende ne’e Komandu PNTL iha semana ida-ne’e rejista mós kazu insidente iha área juridiku munisípiu Dili hamutuk 8, tanba ne’e parte investigasuan kriminál atende rekolla hela dadus husi vítima sira ne’ebé hato’o keixa.

“Ita iha loron 04 to’o 11 ita-nia parte investigasaun Kriminál Munisípiu Dili rejista mós kazu insidente hamutuk 8 dadaun parte investigasaun halo hela atendimentu rekolla dadus husi vítima sira ne’ebé mak mai ona hato’o keixa ba ita atu prosesu”, informa nia. (*)