“Ha'u sei, buka pesoalmente halo diálogu ho grupu sira ne'e, para haree sira bele para, arte marsiál, joven sira-ne'e presiza sai elementu pozitivu ba dame iha rai laran”, dehan Horta iha sala VIP Aeroportu Internasionál Prezidente Nicolau dos Reis Lobato, Komoro, segunda (12/09).

Maske joven sira ne'ebé envolve iha GAM kria violénsia iha sosiedade nia let maibé ida-ne'e krime indívidu kada ema ida nian la'ós ba movimentu tomak arte marsiál nian.

Maibé ba krime ne'ebé sira halo, labele hakribi tanba ema hothotu iha lei ne'e nia okos no laiha ema ida mak boot liu lei iha rai ida ne'e.

“Amu Kardeál rasik nia mensajen foin dadauk, Maun Boot Xanana  nia liafuan, mensajen husi Governu, ha'u-nia mensajen ba joven sira liliu sira ne'ebé arte marsiál ne'e, ida-idak tenke simu nia responabilidade nia konfiansa”, hatete nia.

Pozisaun Xefe Estadu sei fó apoia tomak ba desizaun Governu nian ne'ebé halo polisiamentu konjunta entre Polísia ho Forsa Armada, tanba Governu iha responsabilidade atu garante seguransa ba sosiedade tomak.

“Kuandu grupu ruma, elementu ruma, se sé hakarak provoka instabilidade iha rai laran, Governu iha responsabilidade para mobiliza forsa seguransa, se ita-nia polísia de'it la konsege, bele hetan apoiu tán husi fora armada”, esplika nia.

Husi operasaun konjunta ne'e mós la siknifika nia rezolve ona problema maibé presiza organiza joven sira ko'alia ba malu oinsá mak bele rezolve  problema ida ne'e klean liu.

Tanba ne'e, Xefe Estadu promete, loron ruma iha semana sira mai ne'e, sei halo diálogu ho Grupu Arte Marsiál sira atu buka solusaun ba problema sira ne’ebé mosu.

“Ha'u to'o agora seidauk halo diálogu ho sira tanba ha'u simu pose fulan tolu liubá, situasaun oioin ke halo okupa ha'u nia intensaun mais la siknifika ha'u haluha problema ida-ne'e, ita mós iha mekanizmu husi Governu nian ke halo diálogu dadaun ona, liuhusi sekretariadu estadu prevensaun konflitu, dezastre natural, hamutuk ho Chega, ho G7+, sira halo diálogu komunitáriu buat sira ne'e”, afirma nia. (*)