Vise Minístru Interiór, Antonio Armindo afirma, hafoin apoiu ekipamentu ekipa tékniku husi TLPDP ajuda imediata hodi instala ekipamentu ne'e iha Komandu PNTL Munisípiu Dili.

“Ohin ita mai ho ita-nia parseiru dezenvolvimentu TLPDP mai haree ita-nia situasaun iha Komandu Munisípiu Dili atu hadi’a no ajuda ita imediata hodi instala CCTV nune’e bele fasilita no responde ba difikuldade balu ne’ebé PNTL sira hasoru iha terenu”, esplika Vise-Ministru Interior (VMI), Antonio Armindo, ba jornalista sira iha Komandu PNTL Munisípiu Dili, kinta (08/09).

Razaun instala foun CCTV ne’e tanba ekipamentu barak mak at no la uza desde tinan naruk nia laran hahú kedas iha misaun Organizasaun Nasaun Unidu (ONU) nian.

“Hanesan ita hotu hatene sira-nia CCTV ne’e monta kleur balun desde UN nia tempu tanba ne’e mak Prezudika sira ba monitorizasaun no apoiu ne’e osan mai husi parseiru TLPDP atu komplementa tanba ne’e mak ohin sira mai iha ne’e hamutuk ho komandante unidade sira hotu iha-ne’e aban sira hahú ona”, salienta nia.

Entretantu Komandante Komandu Munisípiu Dili, Superintendente Henrique da Costa hatete, apoiu hirak ne’e tanba iha kooperasaun di’ak husi parseria TLPDP ho Governu.

“Programa apoiu hirak ne’e iha tanba lideransa no kooperasaun di’ak tebes entre Vise Ministru Interiór ho Governu Austrália liuhusi Komandante TLPDP ninian ne’ebé iha komitmentu boot hodi iha komunikasaun di'ak kontinua hametin kooperasaun iha área seguransa, hodi servisu hamutuk kontribui ba estabilidade nasionál nian”, haktuir Komandante Dili ne’e.

Komandante Henrique iha biban ne’e lori estrutura Komandu Dili ninian agradese ba Vise-Ministru Interior ho nia ekipa tomak katak apoiu no suporta husi TLPDP sira -nian mak sei haforsa profisionalizmu no Vizibilidade PNTL nian ne’ebé ikusmai sai mós hanesan konfiansa ema hotu ninian ba Institusaun Estadu ida-ne’e. (*)