“Konsellu Ministrus hala’o sorumutuk iha Palásiu Governu, iha Dili, delibera ona hodi fó podér tomak ba Ministru Defeza, Filomeno da Paixão de Jesus, ba asinatura akordu entre Governu Komunidade Austrália no Governu Repúblika Demokrátika Timor-Leste, kona-ba kooperasaun iha domíniu defeza no ba estatutu Forsa Vizitante sira”, dehan Ministru Prezidénsia Konsellu Ministru, Fidelis Leite Magalhães, iha Pálasiu Governu, kuarta (07/09).

Tanba iha ámbitu Vizita Estadu Prezidente Repúblika Timor-Leste, José Ramos Horta, ba Austrália, durante iha fulan-setembru ne’e nia laran. (*)

Iha reuniaun Konsellu Ministru mós haree projetu sira ne’ebé aprezenta husi Ministra Negósius Estranjeirus no Kooperasaun, Adaljiza Albertina Xavier Reis Magno, ne’ebé Konsellu Ministrus delibera ona hodi aprova naran sira ne’ebé atu propoin ba Prezidente Repúblika ba kargu Embaixadór Estraordináriu no Plenipotensiáriu Repúblika Demokrátika Timor-Leste nian iha Reinu Unidu no ba dupla akreditasaun Embaixadór Timor-Leste nian iha Reinu Béljika ba Fransa, Alemaña, Luxemburgu, Polónia, no Repúblika Xeka. (*)