Tanba, relasiona ho kazu ne’ebé akontese joven sira balun membru F-FDTL ida iha área Akadiruhun bainhira hakalma situasaun tuda malu iha loron segunda (05/09).

“Ne'e mak apela ba maun boot sira, guru sira, ba líder sira kontrola didi’ak membru sira ne'e, para minimiza sira halo krime iha ita-nia rai laran, kontrola ita-boot sira-nia membru sira, para labele halo krime beibeik iha fatifatin sira hotu, nu'udar maun boot nu'udar líder tenkeser iha lideransa ne'ebé mak metin iha forsa para kontrola o nia membru sira ne'ebé halo movimentu iha teritóriu Timor laran tomak, tenkeser tuir doutrina ne'ebé ita-boot sira aprende iha ita-boot sira-nia fatin treinu, katak uza atributu sira iha fatin propriu”, dehan Portavoz F-FDTL, kapitaun José António Nunes da Costa, iha Kuartel Jeneral, Fatuhada, tersa (06/09).

Nune’e husu ba membru Grupu Arte Marsiál hotu, bainhira halo serimónia iha fatin nafatin tau importánsia ba disiplina ne'e importante, nune'e rai doben Timor-Leste nafatin iha estabilidade nia laran.

“Ba fatin ruma halo serimónia karik disiplina ne'e importante, labele halo disturbu ba públiku, liliu ba estabilidade nasionál”, hatete nia.

Aleinde ne'e husu ba públiku labele pániku ba akontesimentu horseik nia ne'e, tanba Timor-Leste ne'e nasaun ida ne'ebé iha nia lei no orden, iha polísia iha militár iha justisa, buat hothotu sei la'o tuir lei no regra ne'ebé iha.

“Apela ba populasaun tomak, labele pániku, nafatin hala’o servisu baibain hodi sustenta moris ne'e, la siknifika akontesimentu horseik ne'e atu impede atividade hothotu, ita-boot sira trauma iha fatin labele, iha ne'e iha forsa iha polísia, kontrola situasaun hotu”, dehan nia.

Entretantu Portavoz ne'e mós apela ba membru F-FDTL hotu katak, orientasaun husi komandu tun ona, tanba ne'e sai ba fatin ruma karik nafatin sai tuir orientasaun ne'ebé iha, ba kumpri misaun tuir orientasaun ne'ebé iha. (*)