Tuir informasaun ne’ebé www.tempotimor.com, asesu iha pájina Relasaun Públika F-FDTL, segunda (22/08) katak, vijita Jenerál Andika Perkasa nian, ba kuartel Jenerál F-FDTL simu ho guadra de honra parada Militár nu’udar tradisaun Militár nian.

Xefe Estadu Maior Jenerál F-FDTL, Tenente Jenerál Falur Rate Laek hatete, enkontru ho Jenerál Andika Perkasa sira ko’alia liu kona-ba Kooperasaun Téknika Militár entre Forsas Armadas Timor-Leste ho Tentara Nasionál Indonezia (TNI).

“Ohin enkontru ho Jenerál Andika Perkasa ne’e, ami ko’alia liu kona-ba treinamentu ne’ebé mak Indonézia sei fó mai Timor-Leste, liliu iha área tolu hanesan Infantária, Navál nomós Aéreo nian, no Indonézia prontu kapasita rekursu umanu FALINTIL-FDTL iha akdemia Militár, formasaun ba Ofisiál superior ninian, no nia hakarak na’in-rua rua kada tinan”, dehan Tenente Jenerál Falur Rate Laek.

Ba futuru entre Forsas Armadas Timor-Leste ho Indonézia sei halo treinamentu konjuntu liliu iha área enjiñária ninian, no sei haruka Forsas Armadas Indonézia mai Timor-Leste halo treinamnetu hamutuk ho FALINTIL-FDTL. (*)