“Mais atu hanoin de'it ida-ne'e tan saida mak 20 agostu mai fahe sasán iha ne'e, fahe sasán ne'e ami hanoin ne'e la to'o, mais mai ita hanoin hamutuk para siknifikadu ida-ne'e fahe sasan ninian”, dehan Bigadeiru Jeneral F-FDTL, Américo Ximenes 'Sabika Bessi Kulit' hafoin partisipa atividade distribuisaun hahán ba komunidade nia oan iha Prizaun Bekora, sábadu (20/08).
Dadauk F-FDTL mai hamutuk ho komunidade sira atu selebra loron FALINTIL nian 20 agostu 1975 ba dala 47 tanba loron ida-ne'e duni mak funda FALINTIL hodi komesa halo funu iha Dili laran depois mai fali iha 7 desembru 1975 ne'e komesa mosu invazaun Indonézia iha Timor-Leste.
Tanba hahú iha 1975, mosu golpe husi parte balun maibé parte seluk kontra ikus mais timoroan ho timoroan iha Diili laran oho malu no mate barak.
Nune'e F-FDTL ida-ne'e hanesan kontinuasaun husi Forsa Armada Libertasaun Nasional Timor-Leste (FALINTIL) nian mai iha ne'e la'ós de'it atu fahe hahán maibé mós atu hamutuk ho komunidade sira hodi hanoin hikas eroi sira-ne'ebe mate ona.
“Agora mai atu hanoin de'it ida-ne'e tanba saida mak 20 agostu mai fahe sasán iha ne'e, fahe sasán ne'e hanoin ne'e la to'o, maibé mai atu hanoin hamutuk para siknifikadu ida-ne'e fahe sasán ninian”, hatete nia.
Ba prezensa F-FDTL nian iha komunidade sira-nia let liliu ba ki'ikoan sira tanba sira mak jerasaun kontinuadór ba futuru Timor nian, no balun aban bainrua bele Prezidénte Repúblika, sai Ministru, nomós Forsa ho Polísia.
Husi atividade fahe hahan ne'ebe F-FDTL organiza la'ós de’it iha Prizaun Bekora maibe mós iha resintu Palásiu Prezidensial Bairo Pite no Largo de Lesidere.
Purtantu ba atividade distribuisaun hahán husi F-FDTL iha Prizaun Bekora ne'e hetan apoiu másimu husi guarda no prizioneiru sira iha Prizaun Bekora.
Iha parte seluk Komandante FALINTIL-Forsa Defeza Timor-Leste (F-FDTL), Brgadeiro Jenerál Maunana, fahe mós hahán ba komunidade iha Largo Lesidere.
“F-FDTL fahe hahán ne'e atu relembra filafali FALINTIL nia luta iha tempu uluk nian, momentu ne'eba populasaun fó hán FALINTIL, entaun agora ami mak fó hán fali populasaun no komunidade sira iha Jardin Largo Lesidere nian”, dehan Brigadeiru Jenerál Maunana.
Tanba ne’e, bolu labarik no komunidade iha Jardin Largo hotu hola hán la'ós atu bosu nian, maibé fó hanoin katak FALINTIL sei hamutuk ho komunidade.
Agostino Maria de Araújo, nu'udar joven ida, nia haree atividade asaun hanesan ne'e sente kontente ho orgullu tebes, tanba forsa bele halo asaun fahe hahaán.
“Ha'u hanesan joven ida sente kontente tebes, dala barak joven sira hanoin forsa sira ne'e la hadomi ema, dala ruma sira hanoin mak lutu ba nasaun, defeza de'it ba fronteira”, dehan nia. (*)