Print this page

Vise PPN Maria Angelina no Família 'Monu' ho Karreta iha Laklubar

By August 18, 2022 2881
Karreta Prado ho sapa matrikula PN 2 ne’ebé Vise PPN Maria Angelina ho família uza hetan dezastre. Karreta Prado ho sapa matrikula PN 2 ne’ebé Vise PPN Maria Angelina ho família uza hetan dezastre. Foto Suplay

Tempotimor (Dili)-Vise Prezidente Parlamentu Nasionál (PPN), Maria Angelina Sarmento, hamutuk ho nia família monu ho kareta Parlamentu Nasonál nian iha loron kuarta (17/08) maizu menus tuku 8 kalan, área Bua-lo, aldeia Tori-lalan, Suku Orlalan, Postu Administrativu Laklubar, Munisípiu Mannatuto.

Ba asidente ne’ebé akontese www.tempotimor.com konfirma ona ho Gabinete Prezidente Parlamentu Nasionál, kinta (18/08) katak, Vise Prezidente Parlamentu nasionál hetan duni asidente.

Asidente ne’e, akontese iha tuku 8 kalan, loron kuarta (17/08), bainhira halo viajen no karreta ho sapa matrikula PN 2 konduz husi Vise Parlamentu nia katuas oan rasik.

Iha akontesimentu ne’e rezulta ema na’in-4 mak sai vítima hanesan Vise Prezidente Parlamentu rasik sofre hirus matan, kanotak no ain rua (la tohar), Vise nia katuas oan hetan sofre iha parte hirus matan, oan mane   hetan kanek iha parte ulun, no oan feto nia de’it bubu.

Motivu husi asidente ne’e, Vise Prezidente PN nia katuas oan condus kareta hola liuhusi estrada ninin no raí mamar hodi rezulta karreta baku fila.

Hafoin akontesimentu komunidade sira ne’ebé hela besik fatin akontesimentu kontaktu kedan ba Xefe Saúde hodi orienta ambulánsia ba evakua vítima sira ne’e ba Sentru Saúde Laklubar.

Dadaun ne’e vítima sira ambulánsia Laklubar kontinua evakua ba Ospital Nasionál Guido Valadares (HNGV).

Diretór Klínika Hospital Nasionál Guidu Valadares, Marcelino Correia hatete, vítima ne’e iha kondisaun di’ak maibé hetan pankada iha nia aintur.

“Kondisaun ne’ebé mak nia hetan enjeral kondisaun di’ak hela soke nia hetan  pankada iha nia ain-tur ida-ne’e mak nia sente iha ne’ebá no médiku sira sei halo hela tratamentu”, dehan nia ba jornalista sira iha HNGV, kinta (18/08)

Dadaun ne’e vítima iha hetan ona tratamentu iha ospitál iha Sala VIP (Verry Important People) iha sala númeru 01  iha HNGV.

Komandante Polísia Nasionál Timor-Leste (PNTL) Munisípiu Manatutu, Superintendente João da Costa hatete, Vise Prezidente Parlamentu Nasionál, Maria Angelina Sarmento, ho família hetan asidente iha aldeia Turi-Lala, Suku Orlalan, Postu Administrativu Laklibar, Munisípiu Manatutu.

“Sim los duni vise PNN hetan asidente duni hodi kalan duni, no hodi kalan kedas halo tranferénsia ba Dili, kondisaun kanek todan no kaman kahur malu”, dehan nia liuhisi telefone, kinta (18/08).

Kronolojia husi akontesimentu ne’e, tanba halai karreta mak falta de kontrollu depois kois mak monu ba rai naruk, alende ne’e, tanba kestaun Estada mós kondisaun la di’ak, depois la’o kalan, no falta de kontrola atensaun dalan, mak monu kois ba rai naruk.

Viajen to’o hetan dezastre ne’e, Vise PPN nia laen/kaben mak konduz karreta.

“Sim, los duni katuas oan mak konduz karreta ne’e”, dehan nia.

Komandnate Munisípiu Manatutu ne’e konta tuir, Vise PPN ho nia família halo viajen husi área Soibada mosu fali iha Laklubar, tanba kalan ona, atu deskansa iha Laklubar mak, nune’e seidauk to’o iha Laklubar, iha dalan hetan ona asidente refere.

“Vise PNN ho nian laen ho nia oan na’in-rua, sira na’in-haat mak iha karreta laran”, konta nia.

Depois akontesimentu Asidente ne’e, ekipa konjunta evakua kedas ona sira ba Ospitál Nasionál Guido Valadares (HNGV), Dili, no transporte ne’ebé mak sira uja dadauk ne’e iha hela fatin asidente. (*)

Rate this item
(1 Vote)
Last modified on Thursday, 18 August 2022 15:14
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items