“Ba ha’u ko’alia tuir nia ha’u-nia kompeténsia de’it maibé Governu hanoin tenke mellora seguransa iha fronteira liliu ba sira-nia infraestrutura ne’e importante”, dehan nia ba jornalista sira iha Rezidénsia PM, Taur Matan Ruak, Farol, tersa (16/08).
Alende ne'e mós sei servisu hamutuk ho komunidade sira oinsá serbisu hamutuk iha área fronteira nian.
“Ita tenke haree mós oinsá para serbisu hamutuk di’ak ho komunidade sira iha fronteira”, haktuir nia.
Nune'e mós sei halo desiminasaun ba komunidade sira hodi kontinua apoiu servisu PNTL no F-FDTL nian hodi salva nasaun husi droga no seluk tan.
“Parte insitituisaun seguransa presiza mós tenke halo desiminasaun para povu sira ne’ebé mak hela besik iha fronteira husu sira-nia kontribuisaun para sira-nia seguransa Naturalmente Polísia ho FDTL de'it sei la halo buat ida mais ita presiza sira-nia apoiu tomak iha fronteira”, hatutan nia.
Bainhira la envolve komunidade iha serbisu fronteira sei kontinua difísil tanba kondisaun fronteira iha dalan ilegál ne'ebé barak.
“Se ita la uza ita-nia povu sira ne'ebé mak hela no servisu iha fronteira ne'e ita sei halo buat ida, tanba hatene ona buat ida estratéjia ne'e ohin haree ema seguransa iha ne'e ita la tama iha ne ne'e ba tama fali fatin seluk, mais ita serbisu hamutuk ho komunidade sira iha fronteira ne'e sei fasil liután ha'u hanoin ida ne'e mak ita tenke haforsa tan ita-nia kooperasaun servísu hamutuk ho ita-nia komunidade sira hela besik iha fronteira tantu iha iha Timór nomós Indonézia nian tanba esensial liu tanba ita la servísu hamutuk ne'e polísia no militár barak destaka iha ne'eba mós akontese nafatin”, afirma nia. (*)