Print this page

PNTL Sei Asegura Graduasaun ba Membru PSHT 4.588

Membru PSHT halo atrasaun iha GMT. Membru PSHT halo atrasaun iha GMT. Foto Suplay

Tempotimor (Dili)-Polísia Nasionál Timor-Leste (PNTL) liuhusi Komandu Munisípiu Dili sei asegura hodi fó seguransa ba atividade Graduasaun membru husi Persaudaraan Setia Hati Terrate (PSHT) hamutuk 4.588, durante loron rua iha munisípiu Dili.

Komandante Operasaun PNTL Munisípiu Dili, Inspetór Xefe Delfin da Silva hatete, komandu Jerál fó ona autorizasaun ba komandu PNTL Munisípiu Dili atu halo seguransa durante loron rua, asegura organizaun arte marsiál PSHT ne'ebé sei halo graduasaun ba membru sira husi Munisipiu tolu hanesan Ermera, Dilli no Likisá.

“Durante loron rua ita sei asegura seguransa ba atividade graduasaun PSHT iha munisípiu Dili, tanba membru sira mai husi Munisípiu tolu hanesan Ermera, Dili no Likisá hamutuk 4.588 mak sei tuir graduasaun”, dehan, Delfin iha Kna’ar fatin PNTL, Kaikoli, segunda (15/08).

Atividade graduasaun ne'ebé mak PSHT sei hala’o durante loron rua mak hanesan Sentru Konvesaun Dili (CCD), GMT no Timor Lodge Komoro, hahú husi loron18 to’o 19 agostu.

“Fatin ne’e sira uza atu halo serimónia graduasaun loron rua mak hanesan CCD, GMT ho Timor Londge totál membru hamutuk 4.588 kompostu husi mane 3.510 no feto 872 membru PSHT dahuluk realize graduasaun iha Timor-Leste”, esplika nia.

Tanba ne'e, komandu PNTL husu ba sidadaun husi organizasaun arte marsiál sira seluk atu respeita malu, nu'udar Timoroan tenke lolo liman ba malu husik problema passadu hateke ba oin hanesan timoroan hadomi malu kria dame ho paz iha sosiadade.

“Ita seguransa nafatin e apelu ba organizasaun arte marsiál hotu atu labele kria konflitu, tenke respeita ba regra ne'ebé estabelese ona livre  atu halo atividade, maibé labele halo problema, tenke hadomi malu hametin domin paz ho dame iha Timor-Leste”, haktenik nia.

Iha fatin hanesan Xefe Seguransa PSHT, Agustino Mesquita Martins hatete, atividade graduasaun PSHT sei realize iha Dili hahú iha 18 to’o 19 agostu, tanba ne’e PNTL husu atu aprezenta ajenda atidade no lista graduante sira atu nune’e PNTL bele halo seguransa.

“Programa iha loron rua hahúu iha 18 to’o 19 ne’e sei halo serimónia graduasaun iha Munisípiu Dili husi Munisípiu tolu hanesan Ermera , Likisá no Dili hamutuk 4.588 mak atu tuir graduasaun iha fatin tolu hanesan CCD, GMT ho Timor Lodge”, dehan nia.

Tanba Governu reativa ona arte marsiál PSHT, IKS no KORK bele halo atividade treinu, maibé tenke obedese ba regra ne'ebé estadu hatur ona, nune’e PNTL hanesan autoridade ne'ebé garante seguransa presiza iha kuiñesimentu.

“Ita lakohi para atividade graduasaun ne'e mosu konflitus sira iha passadu ne’e, nune'e ami husu PNTL atu seguransa ba atividade graduasaun ne’e atu labele mosu dezentendimentu husi arte marsiál sira seluk”, afirma nia.

Tanba diferente iha organizasaun arte marsiál oin iha Timor-Leste, maibé ema hotu tenke hakruuk ba regra ne'ebé estadu hatur ona, bainhira se mak halo sala kria konflitu PNTL nafatin halo atuasaun prosesu tuir dalan legál.

“Ha’u hanesan membru PSTH husu ba maluk organizasaun arte marsiál sira seluk atu fó liman ba malu kria unidade pas iha ita-nia rai ida ne'ebé halo nia ativdade livre labele odi malu”, katak nia. (*)

Rate this item
(0 votes)
Last modified on Tuesday, 16 August 2022 15:19
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items