Komandante Operasaun PNTL Munisípiu Dili, Inspetór Xefe Delfin da Silva hatete, atividade operasaun pasa revista ba transporte karreta ho motorizada no la’o ain tama sai bairo iha área juridiku Munisípiu Dili iha loron (6), nia laran konsege prende motorizada 273 mak kontra lei kódigu estrada.

“Ita iha semana kotuk iha loron neen (6), hahú iha 08 to’o 13 Agostu konsege prende motorizada hamutuk 273 mak kontrola lei kódigu estrada iha área juridiku Munisípiu Dili nian”, dehan, Delfin iha Kna’ar Fatin PNTL Kaikoli, segunda (15/08).

Ba motorizada sira ne'ebé mak PNTL prende ne'e iha 150 mak dadaun ne’e kumpri ona dever hodi selu koima iha banku ho osan hamutuk $7.787 ba kofre estadu no sira seluk seidauk selu.

“Husi motorizada sira ne’e iha 150 mak kumpri ona selu koima hodi mai foti fali ona sira-nia evidénsia motorizada iha Dili, maibé sira seluk seidauk ne’e ita sei asegura nafatin evidénsia sira ne’e, bainhira sira selu hotu ona entrega ona billete ne’e mak ita foin entrega fali motorizada”, afirma nia.

Ba kondutór transporte motorizada ho karreta hotu ne'ebé sirkula iha área juridiku munisípiu Dili tenke hakruuk ba regra hotu, tenke monta asesór transporte kompletu, dokumentu transporte ho karta kondusaun, hafoin bele halo viajem livre.

“Regra sira ne'e ita halo ona sosializaun hahú kedas lei kódigu estrada  eziste, maibé sidadaun sira mak laiha konsiénsia, nafatin kontra, tanba ne’e ita husu atu ita hotu hakruuk ba lei no orden Estadu”, hatete nia.

Tanba ne'e komandu PNTL Munisípiu Dili kontinua orienta eskuadra sira iha área juridiku Munisípiu atu nafatin halo atividade operasaun loron no kalan atu kontrola movimentu transporte no evita krime seluk iha munisípiu Dili. (*)