“Ha'u kansela tanba saída, dezenvolvimentu instituisaun hothotu inklui PNTL tenke tau matan mós ba ita-nia ekonómia. Se hahán oituan, ita hatama ema barak, ne'e kualidade laiha, hahán la to'o, ita problema”, dehan Taur hafoin hasoru malu ho Prezidente Repúblika Jose Ramos Horta iha palásiu Prezidensial Bairo Pite, kinta (11/08).
Tanba uluk sei hanesan Jenerál mós nia prioridade primeiru mak hakarak Membru F-FDTL tenke liu tinan 20 mak bele atinje Membru F-FDTL rihun-3 no hahú husi 2001 to'o iha 2022, to'o tinan rua-nulu liu ona, Membru F-FDTL nian foin to'o 2.600, maibé PNTL ninia membru kuaze sa'e ona ba rihu-4.
Nune'e atu aumenta membru PNTL no F-FDTL mós tenke haree ba ameasa no risku sira iha rai laran, maibé la'ós hatama ema depois ba hán de’it, ejize saláriu, tur de'it iha kaizerna, ida-ne'e labele, hotuhotu tenke serbisu.
“Entaun ha'u dehan ba sira, enkuantu ha'u mak Ministru Interior ho Primeiru Ministru, PNTL ninia rekrutamentu laiha”, afirma nia.
Bainhira Membru barak ida-ne'e dala-barak, hakarak de'it aumenta osan no hahán, nune'e, prioridade daruak mak Membru PNTL ne'ebé tinan-60 tenke ba deskansa, maibé sei altera uluk lei atu nune'e sira hahú deskansa, atu nune'e joven sira bele tama fali.
“Se la'e, katuas hotu ita la'o labele hotu ona, hanoin mós la la'o ona, entaun orsida problema boot”, hatete nia. (*)