Tuir família vítima, Hipolitu Antonio Costelão haktuir, ema na'in-tolu ne'e sa'e motorizada ida derepente mosu hodi sona ku’ak vítima Estevão, hafoin akontese família evakua kedas v’itima ba Hospital Nasionál Guidu Valadares (HNGV) hodi halo tratamentu.
“Sona iha liman loos kalilin okos ne’e, sorte kona nia liman oituan, ne’e mak ninia pulmaun ne’e kanek oituan de’it agora nia me'ar mós di’ak nafatin depois ohin doutor konsege hasai tan fo'er sira iha laran entaun ohin ko'a tan iha okos para tau mangeira para hasai tan fo’er ne’e vítima ne’e nia naran Estevão Perreira”, dehan nia ba jornalista sira iha vítima nia Rezidénsia Lurumata, sábadu (06/08).
Hafoin Evakua ba HNGV família mós informa kedas ba Eskuadra Polísia Dom Aleixo hodi nune’e kontinua buka tuir suspeitu na’in-tolu ne’ebé mak sona vítima Estevão iha Lurumata.
Nune'e Komandante Eskuadra Polísia Dom Aleixo, Alex da Costa “Samurai” bainhira simu informasaun husi família no buka buka tuir hela iha prosesu investigasaun.
Maske hetan ona informasaun husi família sira, maibé Parte seguransa liliu Eskudra PNTL Dom Aleico seidauk hatene motivu husi akontesimentu refere.
“Kazu ne’e tuir informasaun husi ami-nia Ekipa Dom Aleixo ninia katak akontese iha tuku ida madrugada maibé ami seidauk hatene motivu ne’e saida?. Sira sona malu tanba saida ita la hatene, entaun agora dadaun prosesu investigasaun hela”, dehan nia.
Tanba ne’e, prosesu kontinuasaun no informasaun detalladu kona-ba kazu ne’e sei sei fó husi Komandu Polísia Nasionál Timor-Leste PNTL Munisípiu Dili. (*)