“Ha’u simu ona relatóriu, los duni ohin mosu konfrontu tuda malu iha área Bekora, Postu Administrtivu Cristo, entre estudante husi eskola rua sekundária 12 Novembru no estudante sekundária 5 Maio, husi konfrontu ne’e, ita detein suspeitu na’in-31 kompostu husi eskola rua ne’e”, dehan Superintendente Xefe Henrique da Costa, iha kna’ar fatin Kaikoli, kinta (04/08).
Konfrontu tuda malu ne’ebé envolve husi estudante eskola rua ne’e, nia kauza ne’e kle’ur ona ne’ebé iha relasaun ho Grupu Arte Marsiál balun, maibé sei kontinua prosesu investigasaun
“Problema ne’e nia kauza ne’e kle’ur ona, liga ba arte marsiál, ho nune’e mak estudante sira provoka malu to’o mosu konfrontu”, informa nia.
Ba suspeitu sira ne’ebé maka PNTL Eskudra Cristo Rei detein dadaun ne’e, submete ba prosesu investigasaun, iha Komandu PNTL Munisípiu Dili.
“Ha’u seidauk bele fó sai sira-nia inisiál, tanba sira agora dadaun submete hela ba prosesu indentifikasaun no investigasaun ne’ebé halo husi investigadór Komandu PNTL Munisípiu Dili nia’, hatete nia.
Iha konfrontu ne’e, rezulta karreta patrollu Eskudra hetan tuda rahun husi estudante sira no Xefe Investigasaun PNTL eskuadra Cristo Rei konsege kanek, tanba hetan tuda iha ain no transporta kedan ba ospitál hodi halo tratamentu.
“Konfrontu ne’e rezulta Xefe Investigasaun eskuadra Cristo Rei hetan tuda iha ain no karreta ida mak rahun, membru ida kanek ne’e, ekipa sira lori nia ba halo kedan tratamentu no dadaun ne’e laiha buat ida agora membru halo fali ona serbisu iha Eskudra Cristo Rei”, informa nia.
Kona-ba situsaun iha eskola rua ne’e, Superintendente Xefe Henrique da Costa esplika, dadaun ne’e situasaun la’o normál, tanba hafoin akontesimentu konfrontu eskudra Cristo, hetan apoiu husi Eskuadra Dom Aleixo no Na’in-Feto, Eskuadra Vera kruz Forsa Rezerva (Taskforce), Komandu Dili no Batalão Orden Públiku husi Unidade Espesiál (UEP) halo intervesaun hodi hakalma kedan situsaun iha fatin akontesimentu. (*)