“Diploma ida-ne’e ninia objetivu mak atu permite katak Rejimentu Konsellu Superiór Defesa Militár bele kompatibiliza ho Lei Defeza Nasionál ne’ebé vigora hela, ho nune’e revoga Dekretu Governu númeru 6/2016, loron 11 fulan-maiu”, dehan Ministru Prezidénsia Konsellu Ministru (MPKM), Fidelis Leite Magalhães iha Palásiu Governu, kuarta (03/08).

Ho alterasaun ida-ne’e, hanesan define tiha ona iha Lei Defeza Nasionál, ba oin, Jenerál sira ne’ebé laiha efetividade servisu, ne’ebé ezerse ona kargu Xefe Estadu-Maiór-Jenerál Forsas Armadas, Vise-Xefe Estadu-Maiór-Jenerál Forsas Armadas ka Xefe Estadu-Maiór Forsas Armadas, sei integra ba Konsellu Superiór Defeza Militár, ho objetivu atu garante tranzisaun no implementasaun ba objetivu dezenvolvimentu nian sira ne’ebé define ona iha dokumentu estratéjiku sira Defeza nian.

Ba oin, obrigatóriu mós atu halo somumutuk Konsellu ne’e nian kona-ba alterasaun estrutura orgánika F-FDTL nian, no kona-ba proposta sira nomeasaun no ezonerasaun nian ba kargu XEMJFA, Vise-XEMJFA no XEMFA, nomós ba Dispozitivu F-FDTL nian. (*)