Tuir informasaun ne'ebé www.tempotimor.com, asesu iha pájina Servisu Relasaun Públika, segunda (01/08) katak, hafoin simu orientasaun husi Xefe Servisu Informasaun Polísia (SIP) Nasionál, hodi buka tuir no identifika autór sira ba krime p’ubliku mak hanesan kazu na’ok motorizada, hadau telefone, no na’ok sasán husi karreta laran ne’ebé mak sempre akontese iha Dili laran, ekipa servisu konsege asegura tan joven-1 ne’ebé deskonfia envolve iha kazu na’ok motorizada no suspeitu ne’e naran, EFS alias J, tinan 26, hela iha Kampung Baru, Komoro.
Iha loron 29 jullu 2022, ekipa simu informasaun husi vítima ho naran Oscar Lucio Afonso Soares, hela iha Dili, Suku Vilaverde, katak nia motorizada marka Honda Beat ho númeru matrikula N.1403 TLS, ema na’ok iha área Villaverde tinan rua ona, nune’e ekipa dezenvolve tan kazu balu husi suspeitu sira ne’ebé kaptura iha semana kotuk konsege identifika suspeitu EFS ne’ebé ligadu ho kazu na’ok motorizada ne’e.
Suspeitu EFS deklara, nia la’ós motorizada na’in no nia ajuda de’it nia maluk ida iha Baukau hodi mai trata dokumentu motorizada nian iha Dili. Enkuantu motorizada refere sei iha hela suspeitu ho naran NM alias A, tinan 31, husi Aldeia Dataua, Suku Kaibada, Postu Baukau, Munisípiu Baukau.
Hafoin rona deklarasaun ekipa SIP Nasionál ba kedas Munisípiu Baukau hodi halo koordenasaun servisu ho SIP Baukau, la’o hamutuk buka tuir no konsege hetan NM sa’e hela motorizada iha área Seisal.
Iha momentu ne’e, nia koopera di’ak nune’e ekipa konjunta SIP lori kedas NM ba Komandu PNTL Munisípiu Baukau hodi halo identifikasaun.
Iha prosesu identifikasaun NM deklara katak nia hola motorizada Honda Beat ne’e husi nia kolega ida naran AL iha fulan-dezembru tinan 2020 ho montante osan $500 (Dolar Amerikanu atuslima). Selu dala rua, primeiru selu uluk osan ho montante $350, ikus liu selu osan ho montante $150.
NM mós deklara katak suspeitu AL iha Dili hela iha área Pantai Kelapa no iha Baukau AL hela iha área Postu Administrativu Laga. Hafoin halo identifikasaun nia mós halo autu entrega motorizada refere ba PNTL no prontu atu mai hatan wainhira husi parte investigasaun presiza nia prezensa hodi apoiu prosesu investigasaun.
Iha sorin seluk, vítima Oscar Lucio deklara katak nia motorozada rua mak ema na’ok, ida marka Honda Beat lakon iha loron 23 novembru 2020, horas 03:30 otl no iha loron tuir mai loron 24 novembru 2020 horas 04:00 otl vítima nia motorizada Yamaha Vixion lakon tan iha nia uma Vilaverde.
Atu buka tuir autór prinsipál ba kazu na’ok motorizada ne’e ekipa SIP sei relata identidade suspeitu sira-nian ba Sesaun Investigasaun Komandu PNTL Munisípiu Dili hodi hato’o ba Ministériu Públiku atu bele hato’o pedidu ba tribunál hodi hasai mandadu detensaun no mandadu buka tuir suspeitu AL hodi bele identifika tan motorizada Yamaha Vixion ne’ebé mak lakon. (*)
