“PNTL, liliu membru Unidade Patrullamentu Fronteira (UPF) menus rekursu umanu hodi koloka iha liña fronteira terestre, tanba ne'e mak atividade ilegál sira ne'e sa'e maka’as tebes iha semana ida-ne'e nia laran”, dehan Vise MI Antonio Armindo, iha Palásiu Governu, kinta (21/07).

Maske ekipa konjunta PNTL no F-FDTL nafatin detein sidadaun sira no prende sasán ilegál maibé movimentu ilegál nafatin eziste tanba membru la sufisiente atu koloka ba postu seguransa sira.

Rekursu umanu no fasildiade mak fatór importante atu prevene no asegura movimentasaun ema no sasán ilegál husi liña fronteira marítima.

“Tanba ita-nian área fronteira ne’e ho distánsia ne’ebé dook malu, maibé rekursu umanu menus, entaun ita-nian ema sira ne’e aproveita lakunas sira hodi halo negósiu ilegál hanesan mina no sasán nesesidade báziku seluk”, hatete nia.

Nune’e, iha tinan 2023, MI no Komandu PNTL planeia atu halo rekrutamentu ba ajente foun hodi bele apoia membru ezistente asegura liña fronteira Terrestre.

“Ita planu atu koloka efetivu balun tan iha liña fronteira hodi bele asegura atividade ilegál ne’ebé akontese iha fronteira”, katak nia. (*)