Komandante Tránzitu Munisípiu Dili, Inspetór Xefe Domingos Sarmento Gama informa, operasaun kalan ne’ebé konsege detein joven na’in-tolu, no preende transporte sira.
“Operasaun horikalan (20/07) ita konsege prense motorizada hamutuk 25 kareta tolu no na’in-tolu ne’ebé deskonfia laiha karta kondusaun no la hatudu karta kondisaun iha momentu operasaun entaun ita detein na’in-tolu”, hatete nia ba jornalista sira iha Komandu Munisípiu Dili, Kaikoli, kinta (21/07).
Hafoin detein Suspeitu na'in-tolu, iha suspeitu femenina ida ne’ebé mak ohin (21/07) dader hatudu ninia karta kondusaun nune’e ekipa tránzitu sei liberta maibé sira seluk ne’ebé mak seidauk iha karta kondusaun sei aprezenta ba Ministériu Públiku no tuir dalan Justisa nian.
“Motorista na'in-rua ne’ebé mak laiha karta kondisaun ita sei prosesu kontinuasaun ba Ministériu Públiku e kontinua ba tribunál”, dehan nia.
Iha prosesu Operasaun Nasionál Polísia Tránzitu husi Komandu Munisípiu Díli halo ne'e, prende motorizada 25 no karreta tolu (privadu) no detein Suspeitu na’in-tolu mak hanesan, feto ida ho inisiál, MRTT ho idade 24 , mane mane ida ho naran inisiál EPP ho idade 21 no mane ida inisiál PC ho idade 26.
Joven na’in-tolu ne’ebé kaptura lori ba PNTL Munisípiu Dili detein iha ne’ebá no dadaun ne’e iha hela prosesu nia laran. (*)