Komandante Sesaun Polísia Tránzitu Munisípiu Dili, Inspetór Polísia Domingos Sarmento Gama hatete, ekipa tránzitu polísia Munisípiu Dili planu ba oin pasa revista hetan sidadaun ne’ebé laiha karta kondusaun hodi mai detein iha sela ho gratuita la selu multa.

“Iha biban ida-ne’e ita apela ba sidadaun sira iha kapitál Dili, semana oin mai tan kada vez iha operasaun foku liuba ba karta kondusaun laiha mak ita deteta sidadaun sira konduz transporte tantu karreta ho motorizada laiha kartaun kondusaun ne’e krime ita sei kaptura hodi detein hotu iha sela”, dehan Domingos iha kna’ar fatin, tersa (19/07).

Iha planu operasaun ne’e, PNTL sei la haree ba sidadaun nian seksu, bainhira komete krime ne’e la haree seksu mane ka feto, kuandu laiha karta kondusaun sei detein hotu.

“Tanba ne’e, mak ita apela ba ita-nia sidadaun sira, iha semana ida tan mai tan ita sei foku liuba sira halo operasaun foku ba transporte laiha karta kondusaun ita hetan detein iha sela sei la selu multa, hodi nune’e prosesu ba tribunál mak foti desizaun ikus iha tribunál”, afirma nia.

Tanba ne’e, apela ba sidasaun sira, agora kedas hothotu halo nusa trata kondusaun, banhira lori karreta ho motorizada la bele iha impedementu iha estrada públiku tenke iha karta kondusaun.

Entretantu tuir dadus operasaun PNTL husi Seksaun Polísia Tránzitu Munisípiu Dili hahú iha loron 11 to’o iha loron kinta (15/07) konsege prende karreta Governu 10, motorizada 7 no tranporte privadu hanesan karreta 18, no motorizada 187.

Nune’e PNTL aplika ona billete multa ba sidadaun sira hamutuk 226 kumpri ona selu iha banku hamutuk $9,407,00 ba kofre estadu. (*)