Tuir informasaun ne’ebé www.tempotimor.com asesu iha pájina ofisiál Servisu Relasaun Públika, tersa (19/07) katak, hafoin simu informasaun husi Servisu Informasaun Polísia Nasional (SIPN) ne’ebé destaka iha Munisípiu Bobonaro, Komandu PNTL Munisípiu Bobonaro hatun kedas diretiva ba Eskuadra PNTL Bobonaro, halo pasa revista no asegura sidadaun timoroan mane na’in-2 tanba halo tranzasaun ilegál ba kuda 4, iha Suku Oeleu, Postu Administrativu Bobonaro, Munisípiu Bobonaro.

Komandante Munisípiu Bobonaro, Superintendente Antonino Mauluta, deklara, sidadaun ida-ne’e asegura tanba tenta halo tranzasaun ilegál iha fronteira terrestre Timor-Leste ho Indonézia.

“Suspeitu na’in-rua ne’e ho inisiál JS, tinan 52, no suspeitu ida seluk naran MS nu’udar mós eis Xefe Suku Oeleu, tinan 54, no sira na’in-rua hela iha Aldeia Tas, Suku Oeleu, Munisípiu Bobonaro”, informa nia.

Tanba apreensaun ne’ebé PNTL halo ba karreta kamioneta ida ne’ebé tula kuda haat mak iha laran ho intensaun atu fa'an ba Indonézia.

“Iha oras 14.00 otl, iha Postu Administrativu Bobonaro nian membru PNTL Eskuadra Bobonaro halo pasa revista rutina konsege asegura suspeitu na’in-2 no prende kamioneta ida ho númeru matríkula 57.236, ne’ebé mak tula evidénsia kuda-4 liuhusi liña fronteira ba nasaun Indonézia”, hatete Komandante Mauluta.

Kuda sira ne’ebé mak joven aseguradu sira atu fa’an ba Indonézia ne’e sira hola iha Munisípiu Ainaru ho ho folin $1.240.00.

“Ita halo identifikasaun no sira hola kuda ne’e ho montante osan US$ 1.240.00, no kuda 4 ne’e hola iha Munisípiu Ainaro ho nia objetivu lori ba fa’an iha Atambua-Indonézia”, deklara nia.

Tanba ne’e, iha loron horisehik to’o ohin loron Komandu Munisípiu servisu koletivu kaptura ona timoroan hamutuk ema na’in 8 no sei falta tán seluk ne’ebé UPF kaptura no komunidade sira ne’e maioria halo tranzasaun ilegál iha liña fronteira. (*)