Print this page

Militar EUA ho F-FDTL Lansa Ezersisiu Konjuntu iha Baukau

Membru Militár Ezérsitu husi Estadus Unidus Amérika (EUA) ho Falintil- Forsas Defeza Timor-Leste (F-FDTL) hasai foto hamutuk. Membru Militár Ezérsitu husi Estadus Unidus Amérika (EUA) ho Falintil- Forsas Defeza Timor-Leste (F-FDTL) hasai foto hamutuk. Foto Suplay

Tempotimor (Dili)-Membru Militár Ezérsitu husi Estadus Unidus Amérika (EUA) ho Falintil- Forsas Defeza Timor-Leste (F-FDTL) halo lansamentu ezersísiu konjuntu militár ba daruak kona-ba dalan ba dame-22, durante loron 10 iha baze Komponente Terrestre F-FDTL nian iha Baukau.

Tuir informasaun ne’ebé www.tenpotimor.com asesu husi husi ofisiál mídia EUA, tersa (19/07) katak, Membru militár sira husi Ezérsitu Estadus Unidus Amérika no Falintil- Forsas Defeza Timor-Leste (F-FDTL),  iha loron 18 jullu  lansa ona atividade Dalan bá Dame-22, Ezersísiu militár konjuntu daruak entre ezérsitu sira husi Timor-Leste no Estadus Unidus Amérika.

Tanba atividade Ezersísiu militár ne’e sei hala’o durante loron 10, hahú husi loron 18 too loron 28 fulan-jullu 2022  iha Baze Komponente Terrestre F-FDTL Baukau.

“Ezersísiu Dalan bá Dame nuudar ezemplu importante ida kona-ba oinsá Estadus Unidus no Timor-Leste haklean liután ami-nia parseria rohan la’ek”, dehan Vise Xefe Misaun Interinu Estadus Unidus Amérika nian Roy Srinivasan.

Estadus Unidus sente orgullu halo parseria ho F-FDTL hodi dezenvolve Timor-Leste nia kapasidade ba seguransa marítima, asisténsia umanitária, no responde ba dezastre.

Tanba Ezersísiu konjuntu ba dala rua ne’e reforsa kompromisu Estadus Unidus Amérika nian hodi serbisu hamutuk ho Timor-Leste atu hatán ba dezafiu hirak ne’ebé nasaun rua ne’e hasoru.

Ho ezersísiu ida-ne’e patrosina husi Estadus Unidus Amérika nia Ezérsitu iha Pasífiku, envolve membru sira militár Estadus Unidus nian besik nain-50 no F-FDTL nain-100 ho objetivu hasa’e kapasidade interoperabilidade liuhusi treinamentu no interkámbiu kulturál.

Nune’e treinamentu sei inklui interkámbiu asuntu espesializadu no hala’o semináriu dezenvolvimentu profisionál neebé foku ba abilidade báziku sira infantaria nian hanesan patrullamentu, navegasaun terrestre, no abilidade sobrevivénsia iha ai-laran.

Haree ba ezersísiu ida-ne’e dezenvolve bazeia ba parseria ne’ebé aumenta entre Estadus Unidus Amérika no Timor-Leste no promove liután kooperasaun seguransa hodi apoia rejiaun Indo-Pasífiku ida ne’ebé livre no nakloke.

Ba Dalan bá Dame 22 dezenvolve bazeia ba parseria seguransa entre Estadus Unidus Amérika no Timor-Leste, liliu Estadus Unidus nia kompromisu osan millaun $10-resin hodi hamutuk ho Governu Timor-Leste reabilita aeródromu Bauau.

Liuhusi kria Komponente Aéreu ida, projetu ne’e sei fó asisténsia bá F-FDTL no ajuda Governu Timor-Leste hodi monitoriza di’ak liután ninia territóriu marítimu, fornese asisténsia umanitária no promove dezenvolvimentu ekonómiku.

Tanba Estadus Unidus Amérika mós hala’o ezersísiu militár anuál hamutuk tolu ho F-FDTL no simu membru militár Timoroan barak iha Estadus Unidus hodi aprende lian Inglés no hetan edukasaun profisionál militár nian.

Nune’e Estadus Unidus Amérika nia Navál Seabees konstrui no reabilita ona klínika no eskola 100-resin iha Timor-Leste hodi ajuda hari’i futuru ida ne’ebé di’ak liu ba Timoroan sira, nomós kompleta ona projetu lubuk ida ho valór millaun $50-resin iha tinan 10 nia laran. (*)

Rate this item
(0 votes)
Last modified on Tuesday, 19 July 2022 13:49
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items