Tuir informasaun ne’ebé www.tempotimor.com, asesu iha pájina relasaun públika F-FDTL, domingu (17/07) katak, objetivu husi enkontru ne’e, Koronel Liu Miao ho nia adjuntu Major Li Mengyang, despedida ho Xefe Estadu Maior Jenerál F-FDTL, Tenente Jeneral Falur Rate Laek, tanba termina ona nia mandatu iha Timor-Leste.

Tanba Major Li Mengyang, hala’o nia servisu hanesan adjuntu Adidu Defeza Xina iha Timor-Leste durante tinan tolu.

Iha enkontru ne’e, Tenente Jenerál Falur Rate Laek hato’o agradese ba Major Li, ba servisu tomak ne’ebé nia halo durante ne’e.

Nune’e agradese mós ba esforsu hotu ne’ebé Major Li halo durante Pandemia COVID-19 nia laran, hodi Governu Xina fó apoiu nafatin ba FALINTIL-FDTL.

Antes termina enkontru Tenente Jenerál Falur Rate Laek, mós entrega tais FALINTIL nu’udar lembransa husi Forsas Armadas Timor-Leste ba Adjuntu Adidu Defeza, hanesan lasu amizade ne’ebé kesi metin entre Forsas Armadas Timor-Leste ho Forsas Armadas Xina nian.

Adidu Defeza Xina Koronel Liu Miao mós konvida Xefe Estadu Maior Jenerál atu partisipa iha seremónia komemorasaun loron aniversáriu Chinese’s People Liberation Army (PLA) ba dala 95 monu iha loron 1 fulan-augostu tinan 2022. (*)